Цената на акциите на „Snap“ падна откако компанијата прогнозираше приходи од продажба за празничниот квартал што не ги исполни очекувањата на аналитичарите. Ова е знак дека компанијата сè уште не е во состојба доволно добро да се натпреварува со поголемите играчи како „Meta Platforms“ и „Google“ и покрај промените во нејзиниот адвертајзинг бизнис.
Матичната компанија на апликацијата „Snapchat“ соопшти дека нејзиниот приход од продажба ќе биде помеѓу 1,51 и 1,56 милијарди долари во периодот до крајот на септември. Просечната прогноза на аналитичарите е за 1,56 милијарди долари. Приходите во третиот квартал се зголемија за 15 отсто на 1,37 милијарди долари, објави „Snap“, во споредба со 1,36 милијарди долари што аналитичарите очекуваа, според податоците собрани од „Bloomberg“.
Акциите на „Snap“ паднаа за 4% во текот на тргувањето во Њујорк до 10,89 долари по акција. Од почетокот на годинава цената на хартијата падна за 36%.
Во текот на изминатите неколку години, „Snap“ направи промени во својот адвертајзинг бизнис, фокусирајќи се на реклами со директен одговор кои ги поттикнуваат корисниците да преземат одредена акција, како што е посета на веб-локација или преземање апликација. Во минатото, компанијата ги фаворизираше рекламите за подигање на свеста за брендот, кои се поевтини за создавање и изведување, но не толку профитабилни.
Овие напори покажаа ветувачки резултати за бизнисот на „Snap“, но тие не се постојани. „Snap“ ги пропушти проценките на приходите на Вол Стрит во два од изминатите четири квартали.
„Snap“ рече дека корисниците поминале 25% повеќе време гледајќи видео содржини на „Snapchat“ во третиот квартал во споредба со претходната година, што ги натера огласувачите да купат повеќе реклами на страницата. „Snapchat“ објави 443 милиони дневни активни корисници во третиот квартал. Тоа е за 9% повеќе од една година порано и над прогнозите на аналитичарите.
Компанијата троши многу на вештачка интелигенција и технологии за проширена реалност за подобро насочување на рекламите, препорачување видео содржини, создавање филтри за дигитални слики и создавање нови производи, вклучително и паметни очила. „Snap“ планира да потроши речиси 1,5 милијарди долари оваа година за инфраструктурни услуги поврзани со овие технологии, предвидува „Bloomberg“.
„Snap“ објави нето загуба од 153,2 милиони долари за периодот до 30-ти септември, во споредба со загубата од 368,3 милиони долари една година порано. Просечната прогноза на аналитичарите беше загуба од 223,2 милиони долари. „Snap“, исто така, објави дека нејзиниот одбор одобрил програма за откуп на акции од 500 милиони долари, иако таа може да биде прекината во секое време.
