Јужнокорејскиот производител на батерии за електрични возила „LG Energy Solution“ (LGES) претстави „конзервативна“ перспектива за раст на приходите следната година. Компанијата, во меѓувреме, соопшти дека значително ќе ги намали капиталните трошоци поради забавувањето на побарувачката за електрични возила, откако пријави пад на профитот од 39% во третиот квартал.
„LGES“, чија листа на клиенти ги вклучува „Tesla“, „General Motors“ и „Hyundai“, очекува исходот од претседателските избори во САД следната недела да има значително влијание врз насоката на пазарот на електрични автомобили, пренесува „Reuters“.
„Гледајќи напред кон 2025-та година, гледаме континуирана макроекономска несигурност и геополитички ризик, зголемен извоз (на батерии) од кинески конкуренти, како и планови на клиентите (производителите на автомобили) да произведуваат свои батерии, што би ја засилило конкуренцијата“, изјави главниот финансиски директор Ли Чон-сил за време на презентацијата на извештајот.
„Кога станува збор за растот на приходите следната година, имаме прилично конзервативна перспектива“, додава тој.
Компанијата сега очекува капиталните трошоци следната година да бидат значително помали од оваа година, освен некои „суштински и неопходни инвестиции“.
Во април, „LGES“ соопшти дека планира да ги намали капиталните трошоци оваа година поради забавувањето на растот на електричните возила. Дополнително, капиталните трошоци за 2024-та година ќе бидат слични на претходната година со 10,9 трилиони вона.
Неколку производители на автомобили ги забавуваат своите амбиции за електрификација, погодени од ладењето на побарувачката за електрични возила предизвикано од фактори како што се недостатокот на достапни модели, бавното проширување на инфраструктурата за полнење, трговските тензии и зголемената конкуренција наспроти поевтините кинески модели.
Побарувачката веројатно ќе се опорави за околу 18 месеци во Европа и во рок од две до три години во САД, делумно во зависност од развојот на климатските политики и другите регулативи, велат од „LGES“.
„Консензусот е дека стапката на раст на побарувачката за електрични автомобили може да биде побавна доколку Доналд Трамп биде избран за втор мандат во Белата куќа, бидејќи тој предложи намалување на даночните олеснувања за електричните автомобили“, коментира аналитичарот Канг Дон-Џун од „Hyundai Motor Securities“.
„LGES“ објави оперативен профит од 448 милијарди вона (322,84 милиони американски долари) за периодот јули-септември, во согласност со претходната прогноза, но помала од 731 милијарди вона генерирани во истиот период минатата година.
Сепак, посилната побарувачка од некои европски и северноамерикански производители на автомобили му помогна на производителот да ги надмине проценките на аналитичарите од 374 милијарди вони профит.
„LGES“ соопшти дека би забележал оперативна загуба од 18 милијарди вона во кварталот без даночните олеснувања содржани во американскиот Закон за намалување на инфлацијата (IRA).
