Почина Фетула Ѓулен, обвинет за обид за државен удар во Турција

Турскиот муслимански проповедник Фетула Ѓулен, за кој Анкара тврди дека стои зад неуспешниот пуч во 2016 година, починал во Пенсилванија, САД, каде што живеел, објавија турските медиуми и веб-страницата поврзана со Ѓулен. Тој имаше 83 години, објави Ројтерс.

Ѓулен изгради моќно исламско движење во Турција и пошироко, но последните години од својот живот ги помина соочувајќи се со обвинувања дека организирал обид за државен удар против турскиот лидер Реџеп Таип Ердоган. Ѓулен ги негираше обвинувањата.

Веб-страницата Херкулес, која ги објавува проповедите на Ѓулен, на својот Х профил објави дека тој починал во неделата вечерта во болницата каде што бил на лекување.

Ѓулен беше некогаш сојузник на Ердоган, но тие се судрија, при што Ердоган го сметаше за одговорен за обидот за државен удар во 2016 година, во кој одметнати војници командуваа со воени авиони, тенкови и хеликоптери. Во обидот за преземање на власта загинаа околу 250 луѓе.

Ѓулен живееше во самонаметнат егзил во САД од 1999 година.