Густ облак од чад се издига над главниот град на Либан Бејрут откако израелската војска соопшти дека извршила „целен напад“.
Жителите на јужните предградија пријавиле дека слушнале силна експлозија, пренесува Ројтерс.
Бројот на загинати во нападот во Бејрут се искачи на 12, соопшти либанското Министерство за здравство. Повредени се 66 лица, од кои девет се во критична состојба.
Околу десет високи команданти на Хезболах беа убиени заедно со Ибрахим Акил, изјави портпаролот на израелската армија.
„Овие елиминации имаат за цел да ги заштитат граѓаните на Израел“, додаде тој. Тој рече дека Израел не бара ескалација.
Претходно израелската војска објави дека го убила високиот командант на Хезболах, Ибрахим Акил.
„Го елиминиравме Ибрахим Акил, шефот на оперативниот систем на Хезболах, вистинскиот командант на единицата Радван и водачот на планот на Хезболах да ја окупира Галилеја“, се вели во соопштението на армијата. Се додава дека воените авиони извршиле „прецизен напад“ во областа Бејрут.
„Акил и неговите соработници кои беа елиминирани беа меѓу планерите на планот на Хезболах за напад на Галилеја, чија цел беше да ги нападне градовите Галилеја и да убива цивили на начин сличен на она што го изврши терористичкиот Хамас на 7 октомври“, се вели во соопштението.
Ројтерс прво објави дека Акил бил убиен во нападот во јужните предградија на Бејрут.
