Полските и сојузничките авиони беа активирани рано во средата по трет пат во осум дена за да го обезбедат полскиот воздушен простор по руските воздушни напади во Украина, соопшти Оперативната команда на полските вооружени сили.
„Ова е уште една многу напорна ноќ за целиот систем за противвоздушна одбрана во Полска поради набљудуваната активност на авијацијата на долг дострел на Руската Федерација која изведува напади“, соопшти полската команда на социјалната мрежа Х.
Русија изврши ракетен напад врз главниот град Киев и напад со беспилотно летало врз западниот град Лавов, недалеку од границата со членката на НАТО, Полска, соопштија во средата украинските воени претставници, а единиците за противвоздушна одбрана се обидуваат да ги одбијат нападите.
„Да, многу е гласно“, рече регионалниот гувернер на Лавов Максим Козицки преку Телеграм.
Козицки додаде дека се оштетени станбени згради во градот Лавов.
Очевидци изјавија за Ројтерс дека слушнале неколку експлозии на периферијата на Киев и дека звучи како да се активирани системи за противвоздушна одбрана.
Цела Украина е предупредена за воздушен напад, објавија украинските воздухопловни сили преку апликацијата за пораки Телеграм.
