Рускиот напад на Полтава е еден од најсмртоносните од почетокот на војната во Украина.
Мета на Русите денеска беше воена образовна институција во овој град, при што загинаа најмалку 41 лице, а беа повредени повеќе од 180.
Украинскиот претседател Володимир Зеленски изјави дека првите резултати од истрагата покажуваат дека две балистички проектили погодиле воен објект во градот Полтава и блиска болница.
„Повторно и повторно им кажуваме на сите во светот кои имаат моќ да го запрат овој терор: системи за противвоздушна одбрана и проектили се потребни во Украина, а не некаде во магацин“, рече Зеленски, говорејќи по нападот.
Зборувајќи за нападот, Зеленски го повтори повикот до западните сојузници на Украина да му обезбедат на Киев повеќе системи за противвоздушна одбрана и да ги укинат ограничувањата за војската на неговата земја што го користи своето оружје за напади во Русија.
„Ударите од долг дострел кои можат да заштитат од рускиот терор се потребни сега, а не подоцна. Секој ден одложување е, за жал, смрт на луѓе“, додаде тој.
Во изјава за Си-Ен-Ен, украинскиот министер за надворешни работи Дмитро Кулеба рече дека проектилот стигнал до целта за многу краток временски период. Луѓето биле убиени додека се обидувале да побегнат во засолништето, соопштија официјални лица.
„Единствениот начин да се пресретнат беше системот Патриот или системот за противвоздушна одбрана САМП/Т бидејќи тие се единствените способни да пресретнат балистички ракети“, рече Кулеба, кој додаде дека тие биле истрелани од регионот Полтава.
Украина доби многу системи за противвоздушна одбрана „Патриот“ од Соединетите Држави и Германија, но Киев продолжи да вели дека тој број е недоволен за ефикасна одбрана на Украина.
Во јуни, администрацијата на Бајден рече дека им дава приоритет на „критичните капацитети за воздушна одбрана“ на Украина пред другите земји за да се обезбеди опстанок на Украина. Но, Кулеба во вторникот јасно стави до знаење дека новото оружје не може да дојде доволно брзо.
„Не знам уште колку трагедии како оваа треба да се случат за да се исполнат сите ветувања и да се исполнат сите нови обврски“, додаде Кулеба, повторувајќи ги повиците на Зеленски да испрати повеќе одбранбени системи во Украина.
Локалните власти соопштија дека вторникот бил „ужасен ден за Полтава“ и прогласија тридневна жалост. Дополнителни детали за рускиот напад нема да бидат објавени поради „безбедносна загриженост“, рекоа тие.
Министерот за внатрешни работи на Украина Игор Клименко изјави дека службите за итни случаи веќе го локализирале пожарот на самото место и извлекле повеќе од 10 лица од урнатините.
„Сега ги расчистуваме урнатините“, додаде тој.
Клименко рече дека во нападот биле оштетени бројни згради во областа.
„Скршени се прозорците, а фасадите на високите станбени блокови беа погодени од ударни бранови од нападот“, рече тој.
Москва не го коментираше нападот, но истакнатиот руски воен блогер Владимир Рогов претходно во вторникот објави дека Русија нападнала воено училиште во Полтава.
