Во последниот период, скопската Зоолошка градина се соочи со серија трагични настани кои предизвикаа загриженост кај граѓаните.
Смртта на слоницата Дуња, бизонот и редок орел заштитен вид, поттикнаа дебата за условите во кои се чуваат животните.
Граѓаните изразија сериозна загриженост за благосостојбата на животните, особено во време на екстремно високи температури.
Тие сметаат дека животните заслужуваат подобри услови, вклучувајќи климатизирани простории кои ќе им го обезбедат неопходното ладење од високите температури.
Понатаму, граѓаните сугерираат дека ако Зоолошката градина не може да обезбеди соодветна нега и заштита, тогаш би било подобро да се затвори и животните да се вратат во нивните природни средини.
„Буквално се мачат животните. Знаете ли како е да се живее во тесен кафез, а надворешната температура да изнесува над 40 степени Целзиусови? Додека сите ние се криеме од жештините и уживаме под клима-уредите, животните умираат од жештина во скопската Зоолошка градина. Ајде барем еднаш да покажеме човечност и да ставиме клуч на оваа институција. Очигледно, не сме подготвени за ваква одговорна обврска. Уште колку слонови, жирафи, орли, лавови треба да умрат за да сфатиме дека тоа што го правиме е погрешно?“, коментира скопјанка на социјалните мрежи.
Оваа ситуација го отвора прашањето за етиката на заробувањето на диви животни и дали зоолошките градини се најдоброто место за нив.
Додека некои граѓани се залагаат за целосно затворање на зоолошките градини, други бараат подобрување на постоечките услови како компромисно решение.
Во секој случај, се чини дека е потребен итен преглед на стандардите за грижа за животните и можеби дури и реформа на системот кој ги управува зоолошките градини.
Б.З.М.
