Невладините повторно на нозе. Ја алармираат јавноста дека измените на Законот за урбанистичко планирање ќе се носи далеку во ек на летните одмори. И тоа по скратена постапка. Од Министерството за транспорт и врски велат дека со овој предлог на закон ќе се овозможи подобрување на условите за живот преку обезбедување на континуитет во планските документи во руралните односно градските средини и реализација на потребите за домувањето со сите неопходни инфраструктури и градби.
Повторно исто сценарио! Експресни измени во законот за урбанистичко планирање и тоа за време на летните одмори! Ова е првичната реакција на О2 Иницијативата по информацијата дека во понеделник по скратена постапка ќе се носат измените на законот за урбанистичко планирање. Од невладината организација испратија повик до сите пратеници да не ги гласаат измените и да бараат истите да бидат отстранети од предлог-законот!
„Закон со толкав импакт се менува фреквентно поради актуелната потреба, а не се става на здрава основа, осмислен и усогласен со сите други актуелни, па и планирани закони со кои се преклопува. Зошто овој повик до пратениците?! Што се планира со предлог-законот?! Еве ги издвоените измени во Предлог-законот, па проценете самите: Се предлага бришење на одредбата со која јасно е утврдено дека урбанистичките планови кои започнале по старите закони и не успеале да се завршат во рок од 4 години од стапување на сила на законот (18.02.2020), истите да продолжат по новиот закон“, велат од О2 Иницијативата.
Од О2 велат дека со бришење на овој дел, ќе се овозможи стариот закон неограничено да се користи, наместо ДУПовите конечно да тераат по сегашниот закон.
„Се планира да се избрише делот кој уредува ако нема согласнот од Министерство за транспорт, одлуката за носење на урбанистичкиот план да е ништовна и министерот за транспорт да донесе решение за забрана на применувањето на планот. Со бришење на овој дел ќе се овозможи носење на ДУП без согласност и потоа оди докажувај се пред Уставен суд со годинии, а во меѓувреме ќе си се гради и ќе си се гради по тој ДУП. Се предлага бришење на одредбите поврзани со обврската за обезбедување на потврда за урбанистичка усогласеност, со објаснување дека во пракса оваа одредба не се применува поради неусогласност со актуелниот Закон за градење“, велат од О2 Иницијативата.
Од ресорното министерство велат дека целта на изменување и дополнување на Законот за урбанистичко планирање е доуредување на одредбите поврзани со изборот на вршителот за работи од урбанистичкото планирање што ги вршат правни лица со лиценца за изработување на урбанистички планови, за планови и проекти финансирани со средства од буџетот на општината, општината на градот Скопје и градот Скопје ќе се спроведува на начин и постапка согласно со Законот за јавните набавки.
„Со овој предлог на закон ќе се овозможи подобрување на условите за живот преку обезбедување на континуитет во планските документи во руралните односно градските средини и реализација на потребите за домувањето со сите неопходни инфраструктури и градби кои се во функција и овозможуваат подобра социјализација на жителите со продолжување на рокот за донесување на урбанистичките планови започнати по други закони, велат од Министерството за транспорт и врски.
Колку овој апел на еколошкотот здружение ќе има ефект останува да се види до понеделник. Ова е едно од законските решенија кои најмногу имаат претрпено промени. И секогаш пратениците велат дека измените се во насока на подобрување на квалитетот на животот, а се повеќе се гради неплански и населените места стануваат бетонска џунгла.
И.П
