Социјалната мрежа „Pinterest“ предупреди дека нејзиниот приход за тековниот квартал ќе биде помал од очекувањата на аналитичарите, со што цената на нејзините акции падна за повеќе од 13%, пишува „Bloomberg“.
„Pinterest“ очекува приходот во третиот квартал да биде помеѓу 885 и 900 милиони долари, што е под проценките на аналитичарите од 907,7 милиони долари. Главниот финансиски директор Џулија Броу Донели посочи на неколку фактори кои доведоа до послаба прогноза, вклучително и девизните курсеви и фактот дека компаниите за храна и пијалоци рекламираат помалку од очекуваното.
Донели, исто така, ги потсети инвеститорите дека „Pinterest“ не продава политички реклами, што може да го стави во мала неповолна положба во споредба со другите играчи во индустријата.
Цената на акциите на компанијата падна на 29,02 долари по парче во тргувањето после работното време по објавувањето на резултатите. Претходно ја затвори берзанската сесија во Њујорк на ниво од 37,35 долари.
Компанијата работи на зголемување на приходите преку промовирање на директното купување преку своите реклами. Притоа, таа се надева дека ќе заработи од луѓето кои бараат слики за инспирација на нејзината платформа.
„Порано ‘Pinterest’ беше одличен начин за купување, но сите продавници беа затворени. Бидејќи ви го олеснуваме преземањето акција за работите што ги наоѓате на „Pinterest, тоа води до многу повеќе купување“, коментираше извршниот директор Бил Реди.
Приходите се зголемија за 21 отсто на 854 милиони долари во периодот до 30-ти јуни, соопшти компанијата. Аналитичарите анкетирани од „Bloomberg“ прогнозираа 848 милиони долари приходи од продажба во просек. Компанијата сега има 522 милиони месечни активни корисници ширум светот, што е за 12% повеќе од пред една година и малку повеќе од 518 милиони корисници што ги очекуваа аналитичарите.
„Вториот квартал беше трета година по ред кога кликовите на рекламите на ‘Pinterest’ се удвоија од година во година“, рече Реди.
Тој го припишува скокот на подобрените алатки за вештачка интелигенција кои подобро ги приспособуваат рекламите на естетските преференции на корисниците, како и на поголемиот базен на реклами благодарение на договорите со „Amazon“ и „Google“ на „Alphabet“.
Реди коментираше дека „Gen Z“ (оние родени помеѓу 1997 и 2012 година) е најбрзо растечката демографска група на компанијата, која продолжува да сочинува над 40% од публиката на „Pinterest“. Компанијата е насочена кон помладите корисници со тоа што ја прави платформата попогодна за купување и попозитивна од другите социјални мрежи, додаде тој.
