Израел изврши воздушен напад врз пристаниште во Јемен, еден ден откако Хутите ја презедоа одговорноста за смртоносниот напад врз израелскиот град Тел Авив. Портпаролот на Хутите Мохамед Абдулсалам рече дека израелските напади погодиле цивилни цели, резервоари со нафта и електрана. Израелските напади дојдоа еден ден по нападот со беспилотно летало на Хутите во Тел Авив кој уби еден човек, а ранети најмалку 10 други.
Додека Хутите најавуваат нов напад и одмазда, се огласија и од Израел објаснувајќи како ја избрале целта во Јемен и нивните очекувања од другите земји во светот во наредните денови.
„Го таргетиравме пристаништето бидејќи се смета за извор на снабдување за транспорт на борбени средства произведени од Иран до Јемен и се смета за важен економски извор за тероризмот на Хутите. Во областа на пристаништето, ние таргетиравме терористичка инфраструктура со двојна употреба, вклучувајќи ја и енергетската инфраструктура. Тероризмот на Хутите е финансиран од Иран и штети на слободата на пловидба, регионалните пристаништа, Суецкиот канал и целата глобална трговија. Израел очекува дека земјите во светот, кои се погодени од тероризмот на Хутите предводен од Иран, ќе се соочат со овој тероризам обединето. Тоа е заеднички меѓународен интерес“, изјави портпаролот на ИД, Даниел Хагари.
Се огласи и претседателот на Израел, Бенјамин Нетанјаху, кој рече дека „Израел ќе му наштети на секој што ќе им наштети“.
„И така порано денеска го свикав политичкиот и безбедносниот кабинет. Ги замолив да ја поддржат одлуката што ја донесов да нападнам цели на Хутите во Јемен. Пристаништето што го нападнавме не е невино пристаниште. Се користеше за воени цели, се користеше како влезна точка за смртоносно оружје доставено до Хутите од Иран. Тие го користеа ова оружје за да го нападнат Израел, да ги нападнат земјите во регионот, да нападнат меѓународен пат, еден од најважните поморски патишта во светот“, рече тој.
Тој додаде дека оваа операција погодила цели на 1.800 километри од границите на Израел.
„На нашите непријатели им дава до знаење дека нема место до кое нема да стигне долгата рака на државата Израел. Нападот дојде како директен одговор на напад со беспилотно летало во кој загина еден израелски државјанин, а други цивили беа повредени, а тој следеше по агресијата на Хутите врз државата Израел од почетокот на војната. Во изминатите осум месеци, Хутите лансираа стотици балистички ракети, крстаречки ракети и беспилотни летала кон Израел. Сето ова беше успешно пресретнато од израелските одбранбени системи, со помош на нашиот пријател Соединетите Американски Држави, но и со помош на други земји“, рече тој, заблагодарувајќи им се на своите колеги.
Сепак, Хутите се заканија со дополнителна ескалација и одмазднички напади.
„Израелскиот непријател започна немилосрдна агресија против провинцијата Ходеида, таргетирајќи ја со неколку напади на електраната која го снабдува со електрична енергија крајбрежниот град, како и пристаништето и резервоарите за гориво, кои сите се цивилни цели. „Јеменските Хути ќе одговорат на оваа флагрантна агресија и со помош на Семоќниот Бог нема да се двоумат да ги погодат виталните цели на израелскиот непријател“, објавија вечерва.
