Посетата на унгарскиот премиер Виктор Орбан на Москва предизвика бурни реакции во Брисел.
Шокантната посета на унгарскиот премиер Виктор Орбан на Москва, само пет дена откако таа земја го презеде претседавањето со Европската унија, предизвика бурни реакции во Брисел. Иако се очекуваше Унгарија да претседава како чесен посредник меѓу земјите на ЕУ и да го остави настрана национализмот, се чини дека Орбан одлучи поинаку.
За да се оградат од Орбан, ЕУ објави дека, иако тој е претседавач, тој нема овластување да дејствува во име на Европската унија во односите со трети земји. Високиот претставник на ЕУ за надворешна политика и безбедност, Јосеп Борељ, кој е и шеф на заедничката надворешна политика на Унијата, во соопштение за медиумите рече дека оваа посета е исклучиво во рамките на билатералните односи меѓу Унгарија и Русија.
„Унгарија моментално претседава со Советот до 31 декември 2024 година. Тоа не и дава право на никакво претставување на унијата во надворешната политика, бидејќи тоа е привилегија на претседателот на Европскиот совет на ниво на шефови на држави или владата и високиот претставник за надворешна политика и безбедност на министерско ниво“, рече Борељ.
Високиот претставник на ЕУ за надворешна политика и безбедност нагласува дека Орбан не добил никаков мандат од Советот на ЕУ да ја посети Москва.
„Позицијата на ЕУ за рускиот чин на агресија против Украина е претставена во бројни заклучоци на Советот. Оваа позиција ги исклучува контактите меѓу ЕУ и претседателот Путин. Затоа, унгарскиот премиер не ја претставува ЕУ во ниедна смисла. Покрај тоа, вреди да се напомене дека претседателот Путин е обвинет од Меѓународниот кривичен суд и дека е издаден налог за апсење за неговата улога во присилната депортација на деца од Украина во Русија“, изјави високиот претставник на ЕУ за надворешна политика и безбедност Жозеп Борел, се вели во соопштението.
