Баварскиот гигант „BMW“ ги откри сите адути на својот нов модел кој во гамата на германскиот производител ќе ја замени „Seriеѕ 1 Coupe“.
Иако неодамна најавија дека 25-ти октомври ќе биде денот кога „Seriеѕ 2 Coupe“ ќе биде прикажан на светската публика, „BMW“ не успеа до последен моменет да ги сокрие изгледот и техничките детали на овој автомобил. Во неколку наврати, неофицијални фотографии и податоци за погонските агрегати преку различни канали дојдоа до љубителите на автомобили на оваа марка.
На „Стариот континент“, овој нов модел на „BMW“ ќе биде достапен во три верзии, почнувајќи од 220i кој ќе има 2.0 литарски турбо мотор со 184 коњски сили, и забрзување од 0 до 100 за 7 секунди. Потрошувачката кај овој модел ќе биде 6,3 литри на 100 километри со стандардниот мануелен 6-степен менувач.
Следен е моделот 220d кој доаѓа со 2.0 турбо-дизелски агрегат кој исто така испорачува 184 коњски сили, забрзува до „стотка“ за 7,2 секунди и троши 4,5 литри на 100 километри.
Најмоќниот модел ќе ја носи ознаката M235i и ќе испорачува 326 коњски сили од својот 3.0-литарски 6-цилиндарски мотор, кој со стандардниот мануелен менувач до 100 километри на час ќе стигнува за 5 секунди, а со автоматскиот 8-степен пренос забрзувањето до „стотка“ ќе биде за 4,8 секунди. Неговата потрошувачка ќе биде 8,1 литар на 100 километри.
Очекувањата се дека на европскиот пазар ќе бидат достапни и уште неколку верзии, како и моделот со погон на сите четири тркала кој треба да се појави во текот на следната година.
„BMW Seriеѕ 2 Coupe“ ќе пристигне во продажните салони ширум Европа во март 2014-та година. Цената на ова возило во Германија ќе се движи од 29.950 евра за основниот модел со бензинскиот мотор, 220i.
