Израелските медиуми јавуваат дека осум дена откако министерот Бени Ганц поднесе оставка од владата, премиерот Бенјамин Нетанјаху изјави дека воениот кабинет е распуштен.
Нетанјаху синоќа пред безбедносниот кабинет изјави дека воениот кабинет – мал форум создаден на 11 октомври за управување со кампањите против Хамас и Хезболах – официјално е распуштен, пишува The Times of Israel.
Претседателот на Партијата за национално единство Ганц, еден од тројцата членови на кабинетот, минатата недела изјави дека поднесува оставка и ја напушта коалицијата откако Нетанјаху не го исполнил неговото барање да претстави јасна стратегија за Појасот Газа по крајот на војната, земајќи го со себе Гади Ајзенкот, еден од тројцата набљудувачи на воената влада.
Распуштањето на владата се очекуваше, пишува израелскиот весник, бидејќи екстремно десничарскиот министер за национална безбедност Итамар Бен Гвир лобираше да биде додаден во воениот кабинет.
Се очекува Нетанјаху да донесе критични одлуки за војната за време на мали „ад хок“ состаноци без Бен Гвир, додека бара конечно одобрение од поширокиот безбедносен кабинет.
Високиот советник на американскиот претседател Амос Хохштајн денеска ќе го посети Израел во обид да избегне понатамошна ескалација на тензиите меѓу Израел и либанската милитантна група Хезболах, изјави неименуван претставник на Белата куќа.
Хохштајн ќе продолжи со напорите за да се избегне ескалација долж границата меѓу Израел и Либан, рече претставникот, цитиран од „Тајмс оф Израел“.
Американските власти се повеќе се загрижени дека може да дојде до ескалација по голем број мали престрелки на границата меѓу Израел и Либан во последните осум месеци, откако Хезболах ги засили нападите врз Израел во поддршка на палестинската милитантна група Хамас во Појасот Газа.
Портпаролот на израелската армија (ИДФ) Даниел Хагари вчера изјави дека се почестата размена на оган на границата може да предизвика сериозна ескалација.
-Зголемената агресија на Хезболах нè носи на работ на нешто што може да биде поширока ескалација, што може да има катастрофални последици за Либан и за целиот регион – рече Хагари.
Израел и Хезболах разменија напади во последниве месеци додека војната меѓу Израел и палестинската милитантна група Хамас во Газа продолжува, при што двете страни се борат од 2006 година, кога Израел и Либан водеа војна во која беа принудени десетици илјади луѓе од двете страни да ги напуштат своите домови во близина на границата.
