Хеликоптерот „Бел 212“ со иранскиот претседател Ебрахим Раиси и министерот за надворешни работи се урна во неделата додека летал низ планини во густа магла, јавуваат иранските државни медиуми. Според официјалните информации, ниту еден од патниците во хеликоптерот не го преживеал падот.
Воениот аналитичар на Си-Ен-Ен, Седрик Лејтон ги анализирал можните причини за падот на хеликоптерот, а според него, најголема улога можеби имале временските услови.
Имате магла, имате ниски температури. Со температури под 10 Целзиусови степени, откривате дека на поголема надморска височина постои можност за замрзнување на сечилата на роторот, можност за потенцијален дефект на моторот. Значи, постојат многу различни работи кои всушност би можеле да го предизвикаат падот, рече Лејтон.
Тој додаде дека одржувањето на хеликоптерот, исто така, може да игра улога, алудирајќи на санкциите наметнати на Иран и фактот дека Иран користи стара опрема за транспорт на своите високи функционери.
Последната претходна фатална несреќа на Бел 212 беше во септември 2023 година, кога приватен авион се урна во близина на брегот на Обединетите Арапски Емирати, според Фондацијата за безбедност на летови, непрофитна организација која се фокусира на безбедноста на воздухопловството. Последната иранска несреќа од овој тип се случила во 2018 година и во неа загинале четири лица, според базата на податоци на истата организација.
