Се чини дека инфлацијата во САД се стабилизира на малку повисоко ниво, што е последица на експанзивната фискална политика. Во исто време, стапката на американскиот економски раст е висока, па нема потреба да се поттикнува со монетарни мерки.
Инфлацијата навистина се намали, но сепак е над целното ниво. Тоа е постојана состојба. Состојба која се зацврсна и зајакна. Податоците ги потврдуваат аргументите на американската централна банка за одложување на почетокот на процесот на намалување на каматните стапки.
Инфлацијата во САД падна на 3,4 отсто во април, во согласност со очекувањата на економистите, што ги натера инвеститорите да ги зголемат облозите за намалување на каматните стапки на Федералните резерви оваа година и притискајќи ги берзанските индекси на Њујорк на рекордно високо ниво, додека приносите на државните обврзници паѓаат.
Еден ден пред објавувањето на априлските податоци за инфлацијата, претседателот на ФЕД, Џером Пауел, рече дека американската економија „неодамна работи многу добро“, но дека првите месеци од 2024 година покажале „недостиг на напредок“ во намалувањето на инфлацијата до целните два проценти.
Пауел рече дека очекува инфлацијата „да се намалува од месец во месец до нивоа слични на пониските отчитувања што ги имавме минатата година“, но дека неговата „доверба во тоа не е толку висока како што беше порано“. Тој додаде дека ФЕД треба да биде „трпелив и да дозволи рестриктивната политика да си ја заврши работата“.
Предупредувањето на Пауел беше очекувано, бидејќи динамиката на економските активности во САД е највисока меѓу развиените земји, така што намалувањето на каматните стапки би ја подгреало инфлацијата.
Што се однесува до ФЕД, нема причина за брзање, бидејќи невработеноста сè уште опаѓа, а економијата расте, но остатокот од развиениот свет е во проблем, бидејќи нема економски раст или е минимален.
Прашање е како ќе постапат другите централни банки, пред се Европската централна банка (ЕЦБ), бидејќи брзаат да ги намалат каматите за да го стимулираат економскиот раст. ЕЦБ чека сигнал од ФЕД, но засега нема индикации од него за подготвеност да ги намали каматните стапки.
