Во Македонија, молери, плочкари и фасадери се во голем дефицит, а и тие што останаа да работат во земјава обично се презафатени.
Ако ви треба некој од овие мајстори, помирете се со судбината дека ќе треба да почекате месец или два додека да дојдат и да завршат работа.
Ова се веројатно „златни времиња“ за занаетчиите, бидејќи имаат многу работа и добра заработка.
Иселувањето на младите во странство е еден од факторите кои придонесуваат кон оваа состојба. Многу занаетчии си ги затвориле дуќаните и заминаа во други земји, а мал број млади лица се одлучуваат да отворат бизнис или продолжуваат со високо образование.
Следствено, добрите кадри се пребукирани, а бројот на мајстори во земјава е намален.
Мајсторите сами се препорачуваат, а квалитетната услуга солено се плаќа.
Доколку сакате квалитетна работа, барајте препораки и најдете мајстори кои си ја знаат својата работа.
Во внатрешноста на земјата, како во Гевгелија и околината, има доста работа за занаетчиите. Некои од нив веќе имаат обврски за следните неколку месеци.
Златно време е за оние кои работат за себе, но и за оние кои сакаат квалитетна услуга. Допрва ќе дојде време кога цената на услугите на квалитетните мајстори ќе расте, бидејќи дефицитот на мајстори се зголемува, особено во градежништвото.
Во текот на последните месеци, ситуацијата со недостигот на занаетчии во Скопје стана сè поизразена.
Еден скопјанец, кој сакаше да остане анонимен, сподели дека морал да чека цели три месеци за плочкар да му дојде и да ги заврши скалите во неговиот дом.
„Се обидов да најдам плочкар уште кога започнав со планирањето на реновирањето, но сите добри мајстори беа зафатени. Кога конечно најдов еден, ми рече дека има слободен термин за три месеци. Ситуацијата беше фрустрирачка, но немав избор освен да почекам“, изјави тој.
Оваа изјава го потврдува трендот на кој многу граѓани се соочуваат – долгото чекање за занаетчиски услуги поради големата побарувачка и ограничената понуда на квалификувани работници.
Со оглед на тоа што многу млади професионалци се одлучуваат за работа во странство, овој проблем се очекува да продолжи и во иднина.
Според експертите со коишто разговаравме, подобрувањето на состојбата во градежништвото и занаетчиството во Македонија може да се постигне преку неколку клучни чекори.
„Прво, дигитализација. Воведувањето на современи технолошки решенија и дигитални алатки може значително да ја зголеми продуктивноста и ефикасноста на работењето. Образование и обука. Инвестирање во образованието и обуката на кадарот со нови вештини е императив за подобрување на конкурентноста на градежниот сектор. Поддршка од државата. Државата треба да креира политики кои ќе овозможат домашните градежни компании да стекнат референци и да излезат на странските пазари. Решавање на правни проблеми. Адресирање на правните пречки, нерешените имотно-правни односи и бавното администрирање на проектите. Стручен кадар. Зголемување на бројот на стручни кадри преку промоција на занаетите и градежништвото како привлечни професии. Регионална соработка. Учество во регионални иницијативи како Отворен Балкан за подобрување на пазарот на трудот и мобилноста на работната сила. Со овие мерки, може да се очекува подобрување на состојбата во градежништвото и занаетчиството, што ќе придонесе кон економскиот развој и зголемување на квалитетот на изведените работи“, коментираат експертите.
Б.З.М.
