Продажбата на паметни телефони на Apple драстично падна во Кина во првиот квартал од оваа година поради силната конкуренција од домашниот бренд Huawei, се вели во новиот извештај на компанијата за истражување на пазарот Counterpoint Research.
Apple забележа пад на продажбата на iPhone за 19,1 отсто во првите три месеци од оваа година, покажаа податоците на Counterpoint, бидејќи кинескиот гигант за телекомуникации и потрошувачка електроника Huawei видливо го оживеа својот бизнис со паметни телефони и покрај санкциите од САД и делови од Европа.
Компанијата со седиште во Шенжен, Кина забележа раст на продажбата на нејзините паметни телефони за неверојатни 69,7 отсто во првиот квартал, соопшти Counterpoint.
Ова беше во голема мера благодарение на лансирањето на паметниот телефон Mate 60 на Huawei, кој доаѓа со врвен чип кој поддржува 5G вмрежување, пишува CNBC.
Вкупната продажба на паметни телефони во Кина се зголеми за 1,5 отсто на годишно ниво, што го означи вториот квартал по ред на раст.
Huawei доминира во премиум сегментот на мобилни телефони, кој вклучува уреди со цена над 600 долари, бидејќи клиентите ги доживуваат како сигурни. Кога станува збор за поекономичниот сегмент, уредите на Honor се на прво место, а нивните модели X50 и Play 40 се најбарани.
