29 мај, 2024
ПочетнаСВЕТДали Израел ќе цели на иранските нуклеарни постројки

Дали Израел ќе цели на иранските нуклеарни постројки

Шефот на Агенцијата за нуклеарен надзор на ОН, Рафаел Гроси, во понеделникот изјави дека е загрижен поради можноста од израелски напад врз иранските нуклеарни постројки, но дека инспекциите на тие објекти ќе продолжат во вторник.

Израелскиот воен врв во понеделникот предупреди дека ќе одговори на иранскиот ракетен и беспилотен напад во текот на викендот, извршен како одговор на израелскиот воздушен напад врз иранската амбасада во Дамаск, во кој загина и висок функционер на Иранската револуционерна гарда.

Меѓународната заедница, загрижена од можна ескалација на Блискиот Исток, повикува на смирување на ситуацијата.

Директорот на Меѓународната агенција за атомска енергија (МААЕ) изјави дека Иран ги затворил своите нуклеарни постројки во неделата „од безбедносни причини“. Тие повторно беа отворени во понеделникот, но Гроси ја запре работата на инспекторите на МААЕ „до целосно смирување на ситуацијата“.

„Ќе продолжиме утре“, рече Гроси во седиштето на ОН во Њујорк, додавајќи дека паузата нема да влијае на инспекциските активности.

Запрашан за потенцијалните напади на Израел врз нуклеарни постројки, Гроси рече дека „секогаш е загрижен за таа можност“ и повика на „екстремна воздржаност“.

МААЕ континуирано ги проверува главните ирански нуклеарни постројки, како што е постројката за збогатување ураниум во Натанц, центарот на нуклеарната програма на земјата.

Иран тврди дека програмата не е за воени цели, но западните земји го обвинуваат Техеран дека се обидува да развие нуклеарно оружје.

НАЈНОВИ ВЕСТИ

ХОРОСКОП