Во светот на глобалната економија, нестабилноста често доаѓа со предупредување.
Следната недела се најавува како критичен период за пазарите на горива, со очекувања дека ескалацијата на напнатостите помеѓу Иран и Израел може значително да ги зголеми цените на нафтата, кои веќе се наоѓаат на високо ниво.
Според последните извештаи, цените на нафтата неодамна се зголемија и се искачија над 90 долари за барел.
Аналитичарите предупредуваат дека цените може да достигнат и до 100 долари за барел доколку дојде до директен судир помеѓу Иран и Израел.
Економистот Џејмс Сванстон, експерт за Блискиот Исток тврди дека „целосна војна помеѓу Иран и Израел би предизвикала голем скок на цените на нафтата, а со тоа ќе се предизвикаат и прекини во регионалните економии“.
Оваа изјава е во согласност со предупредувањата од Светската банка, која неодамна предупреди дека доколку конфликтот се прошири, цените на нафтата може иницијално да се зголемат за 56 до 75 проценти, достигнувајќи меѓу 140 и 157 долари за барел.
Додека пазарите остануваат во состојба на неизвесност, експертите советуваат инвеститорите да останат внимателни и да ги следат развојот на настаните во регионот кој е клучен за светските снабдувања со нафта.
Со оглед на фактот дека Блискиот Исток е дом на значителен дел од светските резерви на нафта, секоја промена во стабилноста на регионот може да има огромни последици за глобалната економија.
Според домашните експерти, пак, следната недела ќе имаме појасна слика за тоа што ќе се случува со цените на горивата.
„Не верувам дека ќе има драматични промени, големи. Но, клучна ќе биде следната недела што ни претстои, имајќи предвид дека и во Русија се погодени неколку рафинерии кои произведуваат дизел кои имаат 8% до 9% во вкупната потрошувачката во Европа. Така што, следната недела ќе биде клучна, во која насока ќе се движат цените на нафтените деривати“, изјави Марко Бислимоски, претседател на Регулаторната комисија за енергетика (РКЕ).
Б.З.М.
