Цените на основните прехранбени производи на пазарите во Македонија доживеаја значителен скок. Според последните извештаи, цената на гравот достигна ниво кое предизвика загриженост кај потрошувачите – со цена која се движи од 350 денари за килограм, гравот сега чини скоро колку и килограм месо.
Оваа ценовна равенка го става гравот во категорија на луксузни намирници, што е неочекувано за производ кој традиционално се смета за дел од основната исхрана во Македониија.
Продавачите на пазарите се соочуваат со критики дека „баш претерале“ со цените, што ги прави овие основни животни потреби недостапни за просечниот потрошувач.
Сопственикот на тезга на пазарот во Ѓорче Петров, кој се соочува со критики поради високите цени на гравот, изјави:
„Разбирам дека потрошувачите се незадоволни, но морам да објаснам дека откупната цена на гравот значително се зголеми. За да можам да продолжам со работа и да обезбедам квалитетен грав за моите купувачи, немам друг избор освен да ја зголемам продажната цена. Се надевам дека ситуацијата ќе се стабилизира и дека цените ќе се нормализираат, но сè додека откупната цена останува висока, јас морам да ги покријам своите трошоци”, се правда пазарџијата.
40-годишниот Милан Белчев, пак, смета дека високата цена на гравот е поради Велигденските пости.
„Не е во ред гравот да чини толку многу, особено за време на Велигденските пости. Срамота е ако пазарџиите ги користат постите за да заработат. Гравот е основна намирница во посната исхрана, и многу луѓе се потпираат на него како извор на протеини во овој период. Со овие цени, тешко ќе биде за многумина да ги следат постите и да се хранат здраво. Сметам дека треба да има некаква регулација за да се заштитат потрошувачите“, ни изјави Белчев.
Експертите велат дека овој тренд е резултат на неколку фактори, вклучувајќи ги и климатските промени кои влијаат на производството, зголемената цена на транспортот и логистиката, како и инфлацијата која го погоди регионот.
Покрај тоа, намалените приноси на гравот поради лошите временски услови го намалија достапното количество на пазарот, што дополнително ги зголеми цените.
Потрошувачите се повикуваат на властите да преземат мерки за стабилизација на цените и да обезбедат основните прехранбени производи да бидат достапни за сите слоеви на населението.
Б.З.М.
