Во неделата, на последниот ден од руските избори, Украина истрела десетици беспилотни летала врз окупираните територии и Русија, вклучително и избирачко место во регионот Запорожје и Москва, каде летовите од три аеродроми се ограничени, соопштија руските власти.
По нападот се запали општинскиот културен центар во градот Камјанка-Днипровска, напиша рускиот политичар Владимир Рогов, претседател на движењето „Ние сме со Русија“, на каналот Телеграм, а пренесува германската агенција dpa.
Цивилната заштита не можеше да започне со гаснење на пожарот бидејќи продолжија нападите со беспилотни летала. Немаше жртви.
Русија одби вкупно 34 напади со украински беспилотни летала во текот на ноќта, соопшти руското Министерство за одбрана, вклучително и 16 само во јужниот регион Краснодар.
Таму била нападната нафтена рафинерија. Еден пожар бил брзо изгаснат, а работниците биле евакуирани, но едно лице починало од срцев удар.
Војската соопшти дека ги соборила беспилотните летала во Белгород, руски град кој граничи со Украина на југ. Гаѓан е трет ден по ред, пишуваат агенциите, пренесува Хина.
Други локации каде што беа соборени беспилотните летала се Калуга и Курск, соопшти војската.
Во Белгород десетина станбени квартови останаа без струја поради нападот, изјави регионалниот гувернер Вјачеслав Гладков. Оштетени се згради и гасовод.
Балистичка ракета беше истрелана во областа Брјанск.
Сообраќајот преку мостот кон Крим е прекинат.
Во Москва, два дрона го гаѓаа квартот Домодедово, каде што се наоѓа аеродромот, напиша градоначалникот Сергеј Собјанин на каналот Телеграм. Едниот дрон е соборен во областа Раменскоје, а другиот во областа Ступино. Нема извештаи за повредени или материјална штета.
Информацијата не можеше да се потврди независно. Русија често известува само за наводните успеси на сопствената воздушна одбрана против нападите на украинските беспилотни летала.
Ројтерс објави дека московските аеродроми Домодедово, Внуково и Жуковски во неделата наутро воведоа рестрикции на летови од безбедносни причини, повикувајќи се на руската државна авијација.
Агенцијата јавува дека во неделата во близина на Москва биле соборени вкупно пет украински беспилотни летала.
Во последниве недели, Украина сè повеќе ги гаѓаше руските фабрики и објекти со беспилотни летала со цел да го попречи снабдувањето на напаѓачките сили.
Украина се брани од руската инвазија повеќе од две години.
Руските воздушни напади во текот на ноќта оштетија земјоделски погони и уништија неколку индустриски објекти во црноморското пристаниште Одеса, објавија во неделата украинските сили.
Русија лансираше 16 беспилотни летала и седум ракети, објавија украинските воздухопловни сили на апликацијата за пораки Телеграм.
Над регионот на Одеса се уништени 14 дронови.
Противвоздушните сили соопштија дека цел на проектилите биле украинските региони Харков, Доњецк и Чернихив.
