„Nike“ ќе ја намали својата глобална работна сила за околу 2 отсто, бидејќи гигантот за спортска облека продолжува со напорите за намалување на трошоците за да се спротивстави на послабите изгледи за продажба и растечката конкуренција, објави „Bloomberg“.
Компанијата со седиште во Орегон не даде информации за бројот на вработени кои би биле погодени, но моментално има околу 83.700 работници ширум светот.
„Активностите што ги преземаме нè ставаат во позиција да ја правиме нашата организација со вистинска големина за да ги искористиме нашите најголеми можности за раст бидејќи интересот за спортот и здравјето никогаш не бил посилен“, се вели во соопштението на „Nike“.
Укинувањето на работните места уследи по веста во декември дека компанијата сака да заштеди 2 милијарди долари од трошоците, вклучително и со намалување на работната сила и поедноставување на линијата на производи, бидејќи претпазливоста на потрошувачите влијае на продажбата.
Веста предизвика пад на акциите на „Nike“, кои се мачеа да се опорават и останаа во пад од околу 2% оваа година.
Отпуштањата ќе се случат во две фази, според меморандум на „Nike“ што го видел „Bloomberg“. Првата фаза ќе започне денеска и ќе продолжи во наредната недела. Вториот ќе биде завршен до крајот на четвртиот квартал на компанијата.
