Во Ново Село, на околу 10 километри од Скопје, се наоѓа една необична фарма. Таму, во склоп на фармата се наоѓа и домот на семејството Василевски, кое пред неколку години одлучило да го направи свој сон реалност – да одгледува различни видови птици и да произведува органски јајца.
Сопственикот на фармата, Жарко Василевски, во разговор за Денар вели дека конечно можат да живеат онака како што отсекогаш посакувале – во сојуз со природата и со животните.
„И јас, и сопругата, и двете наши деца сме големи љубители на животните и на здравиот начин на живот. Не сакавме да бидеме зависни од индустриската храна, која е полна со хемикалии и хормони. Затоа решивме да направиме наша фарма, каде што ќе одгледуваме птици кои ќе се хранат исклучиво со природна храна, без грам хемија”, објаснува Василевски.
Фармата носи име „Наша фарма” и постои од 2016 година. На неа се одгледуваат главно кокошки, но и други видови птици, како шатки, дукатки, мисирки, фазани, препелици…
Сите тие се слободни да се движат по фармата, која е опремена со куќички, гнезда, хранилки, поилки, тревници, дрвја, цвеќиња…
„Нашата фарма е како една мала зоолошка градина. Птиците се среќни и задоволни, а тоа се одразува и на нивните јајца. Јајцата се многу вкусни и здрави, богати со протеини и витамини. Ние ги продаваме на нашите верни купувачи, кои ги ценат нашите производи и нашата филозофија”, вели Василевски.
Производството на јајца од кокошка е доминантно. Интересот е огромен, бидејќи се ретки и посебни. Цената на јајцата е 20 денари едно или 600 денари за цела табла од 30 јајца. Јајцата од препелица чинат наполу од овие цени, односно, 1 јајце е 10, а цела табла – 300 денари.
„Ние не сме заинтересирани за масовно производство и за зголемување на приходите по секоја цена. Сакаме да го задржиме квалитетот и автентичноста на нашата фарма. Нашата цел е да го збогатиме пазарот со органски јајца, кои се редок и вреден производ во Македонија”, додава Василевски.
Семејството Василевски не само што се занимава со одгледување на птици, туку и со одгледување на пчели и производство на мед. Со својата фарма, тие даваат пример за одржливо и еколошко земјоделство, кое ја почитува природата.
„Ние сме среќни и задоволни со нашиот начин на живот. Ние сме дел од природата и животните, а не нивни господари. Уживаме секој ден, во секоја работа, со секоја птица. Ние сме Наша фарма”, заклучува Василевски.
Интересно е тоа што фармата наскоро ќе биде отворена и за посета, особено за викендите.
„Децата се секогаш пресреќни кога ќе дојдат, бидејќи ја запознаваат природата која очигледно им недостасува во денешно време. Особено се радуваат кога ќе ги видат животните и начинот на кој функционира фармата. Поради тоа дојдовме до идеја да направиме посебно катче за децата каде ќе можат да бидат фармери на неколку часа, да ги хранат пилињата, да собираат јајца… Едноставно ќе научат од каде и како доаѓа храната, а со тоа и да знаат колкав труд е потребно да се произведе едно јајце. На луѓето им недостига едноставноста и чувството да се ужива во сегашноста, во мигот, овде и сега. Сè некако живееме за утре, за следната година, за идниот одмор, за следниот нов купен автомобил или телефон, компјутер, облека, што мислам дека е сосема погрешно“, објаснува сопственикот на фармата.
Б.З.М.
