Хајнекен денеска извести за остар пад на профитот во 2023 година, со повисоки трошоци за отпишување на средствата и помал обем на продажба. Приходите на Хајнекен минатата година пораснале за 4,9 отсто, на 36,4 милијарди евра.
Обемот на органска продажба се намали за 4,7 отсто, што одразува значително послаби резултати во Виетнам и Нигерија. Цените беа за 10,2 отсто повисоки отколку во 2022 година. „Обемот на продажбата беше под влијание на силните цени кои требаше да го неутрализираат многу силниот раст на трошоците за влез и енергија и нестабилноста на одредени клучни пазари“, објасни извршниот директор Долф ван ден Бринк.
Компанијата ја затвори минатата година со нето добивка од 2,3 милијарди евра, 14,1 отсто помалку од 2022 година, што ги истакнува трошоците за отпис на средства. Оперативната добивка е намалена за 24,6 отсто, на 3,2 милијарди евра. Амортизацијата, депрецијацијата и исправката на вредноста лани достигнаа 3,09 милијарди евра, наспроти 1,89 милијарди евра во 2022 година.
Во 2024 година, компанијата очекува од еден до девет отсто повисок органски оперативен профит, објаснувајќи го широкиот опсег на прогнозата со геополитичката и економска нестабилност.
„Остануваме претпазливи во врска со глобалната економска и геополитичка перспектива“, рече извршниот директор Долф ван ден Бринк, додавајќи дека Heineken има намера да ги зголеми приходите со балансирање на обемот на продажба и цените.
