Apple конечно зачекори на пазарот на AR/VR со моделот Vision Pro, кој веднаш привлече внимание поради неговата високотехнолошка опрема и цената од 3.499 долари. Веќе видовме многу критики за Apple Vision Pro, но сега извршниот директор на Meta, Марк Цукерберг неодамна ги сподели своите размислувања за производот, тврдејќи дека Meta Quest 3 е подобра опција од Apple Vision Pro.
Во триминутното видео што го сподели на неговиот личен профил на Инстаграм, Цукерберг го претстави своето неодамнешно искуство со слушалките Apple Vision Pro, кои ги тестираше во изминатите неколку дена. Според извршниот директор, иако Vision Pro има импресивен хардвер, тој верува дека Meta Quest 3 може да ги извршува речиси истите функции по многу поприфатлива цена.
„Зачуден сум од тоа колку е подобар Quest за повеќето задачи кои корисниците ги прават со овие очила, за значителна разлика во цената“, рече Цукерберг.
Извршниот директор на Мета вели дека компаниите носат различни одлуки за дизајн поради многу причини, но тој верува дека Quest 3 е попријателски за корисниците од Vision Pro. Тој вели дека Quest 3 тежи 120 грама помалку, што го прави поудобен за носење подолго време.
Тој се согласува дека екранот со висока резолуција и сензорите за следење очи на Vision Pro се „многу импресивни“, но дека тоа е компромис за ергономијата и удобноста на уредот. Во видеото, Цукерберг исто така најавува дека Мета ќе донесе сензори за следење на очите на идните производи на Quest.
Тој го критикуваше и App Store. Поточно, Цукерберг истакнува дека Meta Quest веќе има „значително побогата“ библиотека со импресивна содржина и игри.
Не е изненадувачки што Цукерберг зазема став во корист на Meta Quest, но сепак е интригантно да се види лидер како него јавно да ги споделува своите размислувања за Vision Pro на социјалните мрежи. Важно е да се напомене дека додека Apple Vision Pro чини 3.499 долари, Meta Quest 3 чини „само“ 499 долари.
