Со пристигнувањето на топлите денови, туристите се подготвуваат за летување и веќе почнуваат да размислуваат на кои плажи да ги поминат своите денови за одмор.
Оние коишто планираат да летуваат во Бугарија, на пример, тамошните плажи можат да ги испразнат нивните паричници.
Зошто? Бугарските власти планираат да ги зголемат цените на туристичките услуги, а тоа може прилично силно да се одрази врз буџетите на туристите.
Според информациите објавени во бугарските медиуми, индексот на инфлација во Бугарија се зголемил за 25% во последните две години.
Ова значи дека концесионерите на морските плажи ќе плаќаат поголеми давачки, а ова влијае и на цените на услугите кои ги нудат.
Денар на оваа тема разговараше со туристички работник од Скопје, кој накратко ни објасни како стојат работите со бугарските плажи.
Тој ги советува Македонците кои планираат летување во Бугарија да си понесат чадори и лежалки од дома, бидејќи, како што вели, цените на чадорите и лежалките на бугарските плажи може да бидат значително поскапени.
„Ова е резултат на зголемените давачки на концесионерите кои се пренесуваат на крајните потрошувачи. Иако Бугарија е популарна дестинација за многу Македонци, оваа година може да биде предизвик за буџетите на туристите. Затоа, ако планирате летување на бугарските плажи, не заборавајте да си понесете чадори и лежалки од дома, за да избегнете неочекувани трошоци“, порача нашиот соговорник.
За поголемиот дел од Македонците, пак, зголемувањето на цените не е единствената причина за бојкот на бугарските плажи, туку голема улога игра и политичката криза во којашто се западнати двете соседни земји.
Александар Петров, татко на две деца, вели:
„Веќе неколку години по ред одиме на одмор во Созопол. Но последниот пат, не се чувствувавме исто. Не сме посакувани како претходно. И не е само тоа. Политичката ситуација во Бугарија не ни дава чувство на безбедност”, вели Петров.
Петров додава дека зголемувањето на цените на туристичките услуги е само еден дел од проблемот.
„Цените се важни, но и чувството на безбедност е нешто што не може да се купи. Ние сакаме да се одмориме, но не на сметка на нашето чувство на безбедност“, посочува тој.
Семејството Петрови сега размислува за алтернативни дестинации за својот одмор.
„Можеби ќе одиме на Халкидики или на Крит. Таму се чувствуваме добредојдени и безбедни“, заклучува Петров.
Со зголемувањето на цените и политичката несигурност, многу туристи може да размислат за своите одмори и да изберат дестинации кои ги задоволуваат исклучително со атмосферата и безбедноста која ја бараат.
Б.З.М.
