Акциите на Нова Љубљанска банка продолжуваат да растат на Љубљанската берза. Во последните четири месеци акциите на НЛБ скокнаа за 35 отсто.
Кои се причините за таквиот ентузијазам на клиентите?
„НЛБ има огромна депозитна база, околу 20 милијарди евра, заедно со депозити на резиденти и компании. НЛБ плаќа многу ниска камата на овие депозити, но од друга страна, преку ноќ може да ги „паркира“ вишокот резерви кај ЕЦБ со каматна стапка од четири проценти, што носи одличен принос. Ова е идеална позиција за банката. Да се додаде дека во периодот на ниски каматни стапки НЛБ има направено многу за оптимизација на бизнисот, дигитализација, услуги итн. Веќе споменатата висока каматна маржа сега влијае на високата профитабилност“, изјави Вид Пајиќ, директор за анализа на Триглав Склад, на вебинарот на Љубљанската берза, пишува Сибиз.
Ѓиво Пулитика, фонд менаџер на InterCapital Asset Management(компанија која остварува 30 отсто од прометот на Љубљанската берза), додава дека минатата година најмногу пораснале акциите на првата котација (НЛБ, Лука Копер и Сава Ре). Пазарот, вели тој, се уште е позитивно оценет.
„Тие нудат добра можност за секој што инвестира на долг рок. Овие акции имаат и висок дивиденден принос. Ако се плашите од поголема нестабилност, можете да бидете сигурни дека дивидендите се стабилни или се зголемуваат секоја година. Би додал и акции на Крка. Мој личен избор се Крка и НЛБ“, вели Пулитика.
Сепак, ликвидноста е сè уште ниска. Минатата година просечниот дневен промет достигна 1,34 милиони евра. Повторно најтргувани беа акциите на Крка со 128 милиони, кои сочинуваа 40 отсто од прометот на сите акции. Една година претходно Крка имаше промет од 190 милиони евра.
„Ликвидноста и натаму е еден од поголемите проблеми на Љубљанската берза, што влијае и на вреднувањето кое е поволно бидејќи инвеститорите добиваат попуст за ниска ликвидност. Нискиот промет ги избрка и шпекулантите кои тешко излегуваат од инвестициите. Љубљанската берза се обидува да ја корегира ликвидноста, државата би можела повеќе. Словенечките акции се повеќе од погодни за пензиско штедење, државата би можела да воведе одредени стимулации кои би помогнале да се зголеми ликвидноста“, изјави Вид Пајиќ, кој ги коментираше и планираните потези на централната банка.
Економиите се во добра состојба, потрошувачите се барем на исто ниво како пред короната, така што централните банки имаат доволно алиби да не ги намалуваат каматните стапки. Претседателот на Банката на федерални резерви Џером Пауел, исто така, нагласи дека сака да види инфлација под целните два проценти. Затоа, нашето централно сценарио е дека ФЕД би можел да започне со намалување на каматните стапки дури во втората половина од годината, а ЕЦБ подоцна.
