Велика Британија ќе ги забрани електронските цигари за еднократна употреба, кои се многу популарни меѓу младите поради нивниот овошен вкус, но ги загрижуваат лекарите и здравствените власти, соопшти денеска локалната самоуправа.
Забраната е дел од поширокиот план за борба против пушењето објавен минатата есен од британскиот премиер Риши Сунак.
„Еден од најзагрижувачките трендови во моментот е зголемувањето на употребата на електронските цигари кај младите и затоа мораме да дејствуваме пред таа да стане ендемична“, вели Сунак.
Според официјалните податоци, кај младите на возраст од 11 до 17 години употребата на електронски цигари за еднократна употреба е зголемена девет пати за две години.
Потрошувачката на овие производи за еднократна употреба е „клучен фактор за алармантно зголемување“ на бројот на млади што користат електронски цигари, забележа британската влада, укажувајќи на непознатите долгорочни ефекти од вдишувањето на чадот.
Министерката за здравство, Викторија Аткинс, рече дека забраната ќе биде на почетокот на следната година.
Покрај забраната за електронски цигари за еднократна употреба, британските власти ќе го намалат бројот на дозволени вкусови за класичните електронски цигари, ќе го направат нивното пакување помалку привлечно и ќе го регулираат начинот на кој овие производи се претставени во продавниците за да бидат помалку видливи за помладите.
Пушењето е водечка причина за смрт што може да се спречи во Обединетото Кралство, соопшти владата, додавајќи дека пушењето предизвикува околу четвртина од смртните случаи од рак.
Лани во октомври премиерот најави и дека сака да ја продолжи забраната за продажба на цигари за Велика Британија постепено да стане земја без тутун.
Во моментот, законската возраст за купување цигари во ОК е 18 години и владата сака да ја зголемува таа возраст за една година секоја година.
