Германскиот парламент (Бундестаг) прифати реформа со која Владата сака да овозможи побрзо стекнување на германско државјанство под одредени услови. Еве ги главните точки на прифатениот закон.
Рок за добивање државјанство
Странците кои сакаат германско државјанство во моментов можат да го добијат најрано по осум години легален престој во земјата. Тој рок треба да се скрати на пет години, а во случај на „посебни достигнувања во интеграцијата“ на три години, пишува Дојче веле.
„Постигнувања“ значат, на пример, добро познавање на германскиот јазик, доброволно општествено ангажирање или многу добри резултати на училиште или на работното место.
Двојно државјанство
На мигрантите во принцип треба да им се дозволи да имаат двојно државјанство во иднина. Досега, апликантите за германски пасош прво мораа да се откажат од претходното државјанство. Ова не важи за граѓаните на другите членки на ЕУ и на Швајцарија, кои веќе можат да имаат две државјанства.
Сојузната влада верува дека многу луѓе се двоумеле да аплицираат за германски пасош затоа што, со откажувањето од постојното државјанство, се плашеле дека ќе ги загубат врските со нивната татковина или со семејството што сѐ уште живее таму.
Германско државјанство за деца
Децата на странски родители, родени во Германија, во иднина би требало безусловно да добиваат германско државјанство доколку барем еден родител легално живеел во Германија повеќе од пет години. Во моментов тој мандат е осум години. Во принцип, децата родени во Германија треба да добијат и германско и државјанство на нивните родители и можат трајно да ги задржат и двете.
Познавање на германски јазик
Побрзото стекнување државјанство во иднина треба да се поврзе и со исполнување на неколку услови. Странците кои сакаат да добијат германски пасош мора да достават докази за добра интеграција и добри јазични вештини.
Исклучоците важат само за членовите на семејството, т.н генерација гастарбајтери кои со децении живеат во Германија. Тие не мора да полагаат тест за државјанство и тест за германски јазик.
Трошоците за живот
Услов за добивање државјанство е способноста на имигрантите да ги сносат трошоците за својот живот во Германија, како и трошоците за издржување на членовите на семејството. Од ова правило би биле изземени гастарбајтери кои дошле во Германија по 1947 година, како и порано т.н. „договорни работници“ од ГДР.
Декларација за основниот закон (Устав)
За да добијат „мајчин“ пасош, странците, како и досега, треба експлицитно да се изјаснат дека го почитуваат слободарско-демократскиот темелен поредок содржан во Уставот. Во Предлог-законот се наведува дека „антисемитските и расистички дејствија, како и оние насочени против родовата или сексуалната ориентација или други дејствија мотивирани од презир кон луѓето“ не се во согласност со уставно гарантираната заштита на човековото достоинство.
Изјава против антисемитизмот
Според плановите на Владата, таа декларација треба да се прошири во иднина. Заднината на ова се, меѓу другото, делумно антисемитските протести на германските улици по нападот на терористичката група Хамас врз Израел. Така, во иднина, апликантите за германско државјанство би морале експлицитно да ја поддржат „специјалната историска одговорност на Германија за националсоцијалистичкото владеење на неправдата и неговите последици, особено за заштитата на еврејскиот живот“.
Поради рускиот напад на Украина, ќе има посебно предупредување за „забраната за водење агресивна војна“. Однесувањето спротивно на овие барања би требало да го оневозможи добивањето германско државјанство.
Одземање на германско државјанство
На лицата кои потекнуваат од странство може да им се одземе германскиот пасош во рок од 10 години, на пример, поради груба измама или давање лажни информации. Реформата предвидува одземање на државјанството во случај на лажна изјава за поддршка на слободарско-демократскиот уставен поредок.
Закон за полесно депортирање
Германскиот парламент (Бундестаг) на 18.01. Во 2024 година, усвои закон кој треба да ја поедностави депортацијата на одбиените баратели на азил и илегалните мигранти. Со тој закон се укинува обврската на државните органи да најавуваат депортација. Исклучок се семејствата со деца под 12 години.
Исто така, приговор или жалба против одлуката за забрана на престој во Германија повеќе не го одложува извршувањето.
Според информациите на Сојузното министерство за внатрешни работи, во декември во Германија биле регистрирани 242.642 лица кои го загубиле правото на престој во земјата. Сепак, 193.972 од нив добиле т.н Duldung, односно привремено право на престој.
