Претседателот на Соединетите Американски Држави, Џо Бајден, вчера за време на говорот во Белата куќа предупреди дека повлекувањето на американската поддршка за Украина може да доведе до руска победа со можното ширење на кризата во балканските земји.
„Ако ние заминеме и Русија може да го издржи нивниот напад и да ја урне Украина, што мислите дека ќе се случи во балканските земји“, рече Бајден.
Тој ги праша присутните што мислат дека може да се случи во областа меѓу Полска и Унгарија.
На приватна средба, помошниците на претседателот Бајден отворено ги предупредија конгресмените дека доколку Конгресот не одобри дополнителна воена помош за Украина во наредните денови, Русија би можела да ја добие војната за неколку недели, во најдобар случај месеци, пренесува Yahoo.
Советникот за национална безбедност Џејк Саливан и директорката на националното разузнавање Аврил Хејнс им рекле на пратениците дека Украина ќе загуби дел од воздушната одбрана и артилериските капацитети во следните недели, според луѓе запознаени со состанокот.
Помошта за Украина, која со месеци е блокирана во Конгресот, е дел од нацрт-законот кој обезбедува финансирање и за Израел и Тајван. Во октомври Бајден побара дополнителна воена помош од 60 милијарди долари за Украина. Конгресот претходно му одобри на Киев околу 75 милијарди долари.
Неодамна украинскиот претседател Володимир Зеленски предупреди на можно ширење на безбедносната криза и на Балканот.
„Обратете внимание на Балканот. Верувајте ми, добиваме информации: Русија има долг план. Блискиот исток, тоа ќе биде барем Балканот, ако земјите од светот не направат ништо сега. Ќе има повторно таква експлозија“, рече Зеленски.
