Со решени повеќето логистички проблеми, автомобилскиот конгломерат успеа да произведе значително повеќе автомобили отколку една година порано.
Да се каже дека групацијата „Volkswagen“ имаше одлична 2023-та година нема да биде претерување, бидејќи и покрај различните проблеми, продажбата речиси го достигна нивото пред пандемијата. Со испорачани 9,24 милиони автомобили од сите марки кои работат под германскиот автомобилски гигант, испораките се зголемија за значителни 12 проценти во споредба со претходната година.
Не само затоа што минатата година побарувачката беше поголема, туку и затоа што требаше да се надополни голем заостаток во испораките на претходно нарачани возила. Зошто? Тесните грла на снабдувањето предизвикани од пандемијата на коронавирус и руската инвазија на Украина, исто така, го нарушија „Volkswagen“.
Со решени повеќето логистички проблеми, автомобилскиот конгломерат успеа да произведе значително повеќе автомобили отколку една година порано. Испораките се зголемија на сите најважни пазари на групацијата „VW“, а Западна Европа беше најголемиот регион со 3,27 милиони продадени возила (+21 отсто во споредба со истиот во 2022-ра година). Веднаш зад неа е Кина со 3,24 милиони автомобили (+2 отсто), а потоа следи Северна Америка со 0,99 милиони единици (+18 отсто).
Целосните бројки за продажба за секоја марка ќе бидат објавени во петок, но веќе знаеме дека изминатите 12 месеци беа одлични за матичната марка „VW“. Испораките се зголемија за 6,7 проценти на околу 4,87 милиони возила, така што приближно 52 проценти од сите автомобили испорачани од Групацијата во 2023-та година го имаа амблемот на „VW“.
Од сите автомобили што главната марка „VW“ ги продаде во 2023-та година, повеќе од половина беа теренци. Пазарниот удел на теренците се зголеми на 54,2 отсто, или 14,9 отсто повеќе отколку во 2022-ра година.
„SUV“ моделите беа уште попопуларни во Соединетите Американски Држави, каде што учествуваа со над 81 отсто од сите испораки. Во Европа, субкомпактниот „T-Cross“ беше најпродаваниот „SUV“ откако постави рекорди во Германија, Обединетото Кралство, Турција и Шпанија.
Конечно, се поставува прашањето – дали „Toyota“ повторно ќе успее да ја собори групацијата „VW“ во однос на продажбата? Пред јапонскиот гигант да ги објави целосните продажни резултати за 2023-та година, потсетуваме дека јапонскиот автомобилски гигант продаде 10,5 милиони возила во 2022-ра година кога трета година по ред ја одбрани титулата најпродаван производител на автомобили во светот.
