„Hewlett Packard Enterprise“ е во напредни преговори за купување на „Juniper Networks“ за околу 13 милијарди долари во обид на речиси 100-годишната технолошка компанија подобро да се позиционира во ерата на вештачката интелигенција, пишува „The Wall Street Journal“.
Договорот би можел да биде објавен уште оваа недела доколку разговорите не пропаднат, според изворите на изданието.
„HPE“ со седиште во Тексас е снабдувач на облак услуги за клиенти кои се движат од мали бизниси до големи корпорации и влади. „HPE“ е огранок на иконата технолошка компанија основана во 1939-та година од Вилијам Хјулит и Дејвид Пакард – „Hewlett Packard“.
Акциите на „HPE“ се затворија во понеделникот на 17,72 долари, со што нејзината пазарна капитализација е скоро 23 милијарди долари.
Акциите на „Juniper“, миленик на ерата на технолошките меури, се затворија на 30,22 долари, што и дава пазарна вредност од околу 9,6 милијарди долари. Акциите на компанијата опаѓаат со години и моментално се тргува со мал дел од она што некогаш го достигнуваше.
Со седиште во Санивејл, Калифорнија, „Juniper“ продава услуги и опрема за комуникациска мрежа како рутери и прекинувачи за технологија, телекомуникациски, финансиски и други клиенти.
„Juniper“, исто така, управува со растечки бизнис со вештачка интелигенција познат како „Mist AI“, кој користи вештачка интелигенција и машинско учење за да го оптимизира корисничкото искуство околу безжичниот пристап, според информациите на компанијата.
Во 2015-та година, „HPE“ беше поделена помеѓу давател на услуги за претпријатија и производител на компјутери и печатачи познат како „HP“, потсети „WSJ“.
Договорот помеѓу „HPE“ и „Juniper“ би бил едно од најголемите технолошки преземања во последно време, во услови на забавување на обемот на спојувања во секторот поради построгата антимонополска контрола од Вашингтон.
Меѓу очекуваните големи зделки, според „WSJ“, е и купувањето на „Ansys“ од страна на „Synopsys“ за околу 35 милијарди долари.
