Кинеската технолошка компанија „Huawei“ очекува да пријави приход над 700 милијарди јуани (99,24 милијарди долари) во 2023-та година, се вели во новогодишната порака до вработените во кинеската корпорација испратена од нејзиниот ротирачки шеф Кун Ху и видена од „Reuters“.
Приходите на „Huawei“ исто така се очекува да се зголемат за околу 9 отсто оваа година од 2022-ра година, кога достигнаа 642,3 милијарди јуани (91,06 милијарди долари).
Прогнозата за заработката на „Huawei“ оваа година е уште еден знак дека кинеската компанија се опоравува од санкциите што САД почнаа да и ги воведуваат во 2019-та година, наведува „Reuters“. Санкциите негативно се одразија на некои од активностите на корпорацијата, бидејќи ѝ беше блокиран пристапот до технологии и делови неопходни за нејзините активности за истражување, развој и производство.
Во пораката испратена од Кун Ху до претставниците на компанијата се вели дека бизнисот со паметни телефони и други електронски уреди на „Huawei“ се развива подобро од очекуваното во 2023-та година.
Во август кинеската компанија лансираше нова серија паметни телефони – „Mate60“. Се верува дека тие се вградени со чипови кои биле развиени и произведени во Кина.
Во октомври, испораките на паметни телефони произведени од „Huawei“ се зголемија за 83 проценти на годишно ниво (во споредба со октомври 2022-ра година).
