Кинескиот производител на автомобили „Nio“ официјално го претстави својот нов електричен премиум модел, „Nio ET9“, за кој се надева дека ќе им конкурира на „Maybach“ и „Panamera“.
Цената на овој автомобил е 102.000 евра, што го прави не само најнапредниот „Nio“ до сега, туку и најскапиот досега.
„Nio ET9“ е долг 5.325 mm, широк 2.016 mm и висок 1.620 mm, а како што соопштија од компанијата, најважно им било да ги исполнат потребите на возачот кога станува збор за удобност, безбедност и леснотија при возењето на возилото.
Ентериерот е означен со „Sky Island“ и „Executive Bridge“, кои создаваат чувство на луксуз и удобност. Има и маса со вртење за 360 степени за патниците одзади која може да се прилагоди на кој било агол.
Автомобилот е опремен со батерија од 120 kWh, односно архитектура од 925 V, која овозможува максимална моќност на полнење од 600 kW.
Се напојува од два електромотори – напред е индукциски асинхрон мотор со моќност од 180 kW, додека одзади има синхрон мотор со постојан магнет кој има моќност од 340 kW. Севкупно, ова е доволно за да се испорача моќни 707 ks.
