Чен Бингхуа, портпарол на кинеската канцеларија за регионални прашања на Тајван, денеска изјави дека Пекинг ќе воведе нови економски санкции кон Тајпеј доколку владејачката партија на островот продолжи да инсистира на независност.
„Ако властите на Демократската прогресивна партија (ДПП) се решени да истраат и да продолжат тврдоглаво да се придржуваат до својот став за независноста на Тајван и да одбијат да се покајат, ние ги поддржуваме релевантните министерства да преземат дополнителни мерки во согласност со прописите“, рече Чен на брифинг со новинарите, нешто повеќе од две недели пред претседателските и парламентарните избори во Тајван, пренесува Ројтерс.
Изборите во регионот на Тајван ќе се одржат на 13 јануари, а регионалните власти претходно овој месец ја обвинија Кина за економска принуда и мешање во изборите, откако Пекинг објави крај на намалувањето на царините за одредени производи што ги увезува од островот, велејќи дека Тајпеј го прекршил трговскиот договор кој беше потпишан во 2010 година. Актуелниот потпретседател на регионот на Тајван, Лаи Чинг Теа, кој води во анкетите, рече дека не планира да го промени формалното име на островот во „Република Кина“, додавајќи дека само народот на Тајван може да одлучува за нивната иднина.
Поразената републиканска влада побегна во Тајван во 1949 година, откако беше поразена во граѓанска војна од комунистот Мао Це Тунг, кој ја основа Народна Република Кина со главен град Пекинг. Властите на регионот Тајван тврдат дека островот е независна земја, додека Пекинг инсистира дека Тајван е дел од нејзината територија.
