На само две недели пред Нова година, многу скопјани се во потрага по новогодишна елка за да го украсат својот дом и да го внесат празничниот дух.
Но, оваа година, најубавите елки не се лесно достапни и не се баш евтини.
„Цената на новогодишните елки е повисока за разлика од ланската година. Причина е тоа што увозната цена е повисока од ланската цена. Ние увезуваме елки од Словенија, Хрватска и од Србија, и тие земји сега имаат поскапо производство и транспорт”, вели Дејан, продавач на новогодишни елки во дуќан во центарот на Скопје.
Дејан додава дека најпопуларните елки се оние со висина од 1,5 до 2 метри, кои чинат од 5.000 до 10.000 денари, во зависност од квалитетот и густината на гранките.
Тој вели дека има и поевтини елки, кои се продаваат за 2.000 до 3.000 денари, но тие се помали, поретки и со послаб квалитет.
„Јас сакам да купам новогодишна елка за да го израдувам своето дете, но не можам да си дозволам да дадам толку пари за елка. Посетив повеќе дуќани низ Скопје и не можев да најдам квалитетна и убава елка која е поевтина од 7.000 денари”, вели Синиша, скопјанец, кој е во потрага по елка.
Синиша вели дека ќе се обиде да најде елка на пазарот или на интернет, но се плаши дека и таму ќе се соочи со истиот проблем.
Тој се надева дека цените ќе паднат непосредно пред Нова година или дека ќе најде некоја акција или попуст.
„Новогодишната елка е симбол на празникот и на семејната среќа. Јас сакам да имам елка во мојот дом, но не сакам да се задолжувам за неа. Се надевам дека продавачите ќе бидат разумни и ќе ги намалат цените, за да може сите да си купат елка и да ги израдуваат своите деца”, коментира Синиша.
Но, не сите скопјани се жалат за цената на новогодишните елки.
Има и такви кои одлучиле да бидат креативни и да направат свои елки од различни материјали како хартија, пластика, дрво или метал.
„Не сакам да трошам пари за елка која ќе ја фрлам по Нова година. Сакав да направам нешто уникатно и еколошко. Затоа, искористив неколку стари книги, списанија и весници за да направам елка од хартија. Таа изгледа прекрасно и ми дава чувство на задоволство”, вели Дина, студентка по уметност во Скопје.
Дина додава дека ја украсила својата елка со светилки, ленти и оригами фигури. Потрошила само 500 денари за целата елка за која потрошила цел еден ден.
„Мислам дека новогодишната елка не мора да биде скапа и да се купува од дуќан. Новогодишната елка треба да биде израз на нашата креативност и нашата личност. Сакам да им покажам на луѓето дека може да се направи нешто убаво и со малку пари”, вели Дина.
Б.З.М.
