Во наредните 7 месеци, вкупно 15.000 студенти кои живеат надвор од местото на студирање, ќе добијат ваучер за превоз во износ од 600 до 1.200 денари.
Ова, како што истакна премиерот Димитар Ковачевски, се прави во рамки на деветтиот пакет антикризни мерки во вредност од 662 милиони евра.
Но, очигледно, одлуката да им се доделат ваучери за превоз само на студентите кои живеат надвор од местото на студирање предизвика незадоволство кај дел од студентската популација.
Студентите кои живеат во истите градови каде што студираат се чувствуваат дискриминирани и занемарени од државата, бидејќи немаат право на истата помош.
„Студирам на Факултетот за медицина во Скопје, а и живеам во Скопје. Секој ден треба да плаќам превоз до факултетот, а и да купувам скапи учебници и материјали. Не е фер што студентите од други градови ќе добијат ваучери за превоз, а ние ништо. Дали ние не сме исто така студенти?” – вели 21-годишната Ана-Марија.
23-годишниот Иван Најденов, студент на Правниот факултет во Скопје, обвинува дека Владата прави чиста дискриминација.
„Јас сум студент на Правен факултет во Скопје и живеам во Скопје. Сметам дека оваа одлука е дискриминирачка. Студентите кои живеат надвор од местото на студирање веќе имаат право на студентски домови, стипендии и субвенционирана исхрана. Зошто треба да им се додели уште една помош, додека ние сме препуштени на самите себе?” – реагира Најденов.
Слично мислење делат и студентите од другите градови.
„Јас сум студент на Медицинскиот факултет во Тетово, а исто така живеам во овој град. Сметам дека ваквата владина одлука е апсурдна и нелогична. Студентите кои живеат надвор од местото на студирање веќе имаат можност да се вратат во своите домови за време на викендите и празниците, додека ние мора да останеме во градот и да се справуваме со сите трошоци. Не е праведно што ние ќе останеме без никаква помош од државата, додека тие ќе добијат ваучери за превоз”, ни изјави Ерсин Х.
Студент од Скопје му постави и директно прашање на премиерот: „дали покачување на платата за 78% добија сите владини функционери или само оние кои живеат надвор од Скопје?“
Б.З.М.
