Рускиот претседател Владимир Путин, придружуван од четири руски борбени авиони, направи еднодневна турнеја на Блискиот Исток, при што ги посети Обединетите Арапски Емирати, пред да замине за Саудиска Арабија.
Во средата, Путин слета во Абу Даби, главниот град на Обединетите Арапски Емирати, кој е домаќин на климатскиот самит на Обединетите нации COP28.
Претседателот на таа земја од Персискиот Залив, шеикот Мохамед бин Зајед Ал Нахјан, го пречека Путин во претседателската палата, нарекувајќи го „драг пријател“, а авионите од Обединетите Арапски Емирати го пречекаа лидерот на Кремљ прелетувајќи и оставајќи трага во боите на руското знаме.
„Мило ми е што повторно се среќаваме“, рече шеикот Мохамед. Тој подоцна рече дека разговарале за „важноста од зајакнување на дијалогот и соработката со цел да се обезбеди стабилност и напредок“.
„Нашите односи, главно благодарение на вашата позиција, достигнаа невидено високо ниво“, му рекол Путин на шеикот Мохамед. „ОАЕ се главниот трговски партнер на Русија во арапскиот свет“, додаде тој.
Путин рече дека Русија и ОАЕ соработуваат како дел од ОПЕК+, чии членки извлекуваат повеќе од 40 отсто од светската нафта.
По ОАЕ, Путин патува во Саудиска Арабија на неговата прва средба лице в лице со Мохамед бин Салман од октомври 2019 година. Неговата последна посета на регионот беше во јули 2022 година, кога се сретна со врховниот лидер ајатолахот Али Хамнеи во Иран.
Не беше јасно што точно Путин, кој ретко ја напушта Русија од почетокот на војната во Украина, има намера да направи за пазарот на нафта со принцот престолонаследник на најголемиот светски извозник на сурова нафта, само неколку дена по одложувањето на клучниот состанок на ОПЕК + поради несогласувања.
Кремљ соопшти дека, покрај нафтата, ќе разговараат и за војната меѓу Израел и Хамас, за ситуацијата во Сирија и Јемен, како и за прашања како што се обезбедување стабилност во Заливот.
