Матичната компанија на „TikTok“, „ByteDance“, планира да го прекине својот бренд за игри „Nuverse“ и да се повлече од главните видео игри, велат четворица запознаени со ова прашање.
„ByteDance“ изјави за „Reuters“ дека одлучил да го реструктуира својот бизнис со игри, без да даде дополнителни детали.
„Редовно ги прегледуваме нашите бизниси и правиме прилагодувања за да се фокусираме на долгорочните стратешки области на раст. По неодамнешниот преглед, донесовме тешка одлука да го реструктуираме нашиот бизнис со игри“, рече портпаролот.
Според изворите, „ByteDance“ ќе им каже на своите вработени во понеделник да престанат да работат на необјавени игри до декември и дека компанијата ќе бара начини да продава веќе објавени наслови.
Одлуката најверојатно ќе влијае на стотици вработени, од кои некои дознаа за овој потег во текот на викендот, велат изворите.
Кинеската технолошка компанија не планира да се врати на глобалниот пазар на видео игри од 185 милијарди долари, додаваат тие, одбивајќи да бидат идентификувани бидејќи информациите не се јавни.
Брендот за обични игри „Ohayoo“, чии игри се прикажани на „Douyin“, сестринската апликација на „TikTok“ во Кина, нема да бидат засегнати, ниту пак игрите што се на „TikTok“, рече еден од изворите.
„Reuters“ минатиот месец објави дека „ByteDance“ почнал да бара купувачи за својата подружница за развој на игри „Moonton Technology“. Таа, исто така ја реструктуираше својата компанија за виртуелна реалност „Pico“, отпуштајќи голем дел од својот тим за содржина.
Создавањето на „Nuverse“ од „ByteDance“ во 2019-та година се сметаше за огромен поттик за глобалниот сектор за игри и стратешки елемент во неговата конкуренција со локалниот ривал „Tencent Holdings“, најголемата светска компанија за игри.
Сепак, перформансите на „Nuverse“ се нерамномерни. Најпознатата игра е „Marvel Snap“, онлајн игра со карти која доби обожаватели, но не стана комерцијален хит. Други наслови вклучуваат „One Piece: The Voyage“ и „Crystal of Atland“.
„Nuverse“, исто така, се најде во фокусот во 2021-ва година, кога „ByteDance“ го официјализираше својот статус како една од шесте деловни единици под пошироко реструктуирање.
За да изгради производствен капацитет, „Nuverse“ се здоби со надворешни студија, вклучително и „C4games“ во 2021-ва година.
