Славата е еден од најважните обичаи во македонската култура, кој се пренесува од колено на колено. Но, во последно време, се појавува нов тренд меѓу дел од македонските граѓани, особено оние со високи примања, да ја слават својата куќна слава во ресторан, наместо во домашна атмосфера.
Тоа го прават за да не мора да губат време за готвење, но и за да им остане домот чист.
Еден од нив е и Венко Р., кој веќе неколку години својата куќна слава „Свети Архангел Михаил“ ја слави во ресторан, каде што ги чести ручек најблиските роднини и пријатели.
Тој вели дека можеби чудно звучи куќна слава да се слави во ресторан, но такви му се можностите и нема време да се подготвува за славата.
„Јас работам во една меѓународна компанија и имам многу обврски и одговорности. Не можам да си дозволам да губам цел ден за готвење и за средување на домот. Затоа, одлучив да ја славам славата во ресторан, каде што можам да се посветам на моите гости и да уживам во дружењето. Секоја година барам ресторан кој нуди традиционална македонска кујна, за да не се изгуби суштината на славата. Се трудам и на ресторантската трпеза да ги има оние традиционални славски специјалитети: кифлички, сарма, риба, гравче-тавче…“, вели Венко.
Оваа година, тој потрошил околу 12.000 денари за славата во ресторан, што е значително повеќе од тоа што би потрошил доколку ја славел славата дома.
„Не ме интересира што ќе кажат другите за тоа што ја славам славата во ресторан. За мене, тоа е личен избор и начин на живеење. Јас не сакам да се мачам со готвење и средување, туку сакам да се почувствувам пријатно и да го почитувам светецот кој го славам. Славата е во срцето, а не во местото каде што се слави“, заклучува нашиот соговорник.
Овој тренд на славење на куќна слава во ресторан не е прифатен од сите.
Некои верници сметаат дека тоа е заборавање на традицијата и оддалечување од семејните вредности. Тие велат дека славата е нешто што треба да се слави дома, во топла и срдечна атмосфера, каде што се споделуваат радоста и благословот на светецот. Тие додаваат дека славата не е само ручек, туку и обред, кој се изведува со свеќа, жито и колач.
Како и да е, секој има право да ја слави својата куќна слава како што сака и може. Важно е да се запамети дека славата е симбол на верата, идентитетот и заедничката судбина на македонскиот народ.
Б.З.М.
