„Siemens AG“ ќе инвестира 510 милиони долари во нов производствен капацитет во САД, вклучително и фабрика за електрична опрема во Тексас, за да го прошири својот синџир на снабдување во Северна Америка, пишува „Bloomberg“.
Инвестициите ќе се фокусираат на центри за податоци, производство на полупроводници и батерии, се вели во соопштението на германскиот индустриски гигант во петокот. „Siemens“, исто така, ќе одвои 150 милиони долари од средствата за изградба на објект во Форт Ворт, Тексас, за производство на опрема наменета за напојување индустриски постројки и центри за податоци.
Севкупно, планот ќе отвори 1.700 работни места, вклучително и 700 во Форт Ворт, соопшти компанијата.
Дополнителните инвестиции се мотивирани и од достапните стимулации и од бумот на побарувачката за инфраструктура за вештачка интелигенција.
„Ние првенствено ја поддржуваме индустријата за центри за податоци со големи јазични модели. Затоа инвестираме“, изјави извршниот директор Роланд Буш во интервју за „Bloomberg“.
„Siemens“ ги обврза американските средства како дел од поширокиот план да инвестира 2,2 милијарди долари за проширување на производството на висока технологија ширум светот. Компанијата исто така има планови за нова фабрика во Сингапур и надградба на постоечки капацитет во Ченгду, Кина. Локално, „Siemens“ користи програмски средства од 1 милијарда евра за нов технолошки кампус и производствена експанзија во Баварија.
Во САД, производителите долж синџирот на снабдување со чипови се редат за да обезбедат финансирање од минатогодишниот Закон за чипови, кој нуди субвенции за полупроводници во вредност од 100 милијарди долари. И Законот за намалување на инфлацијата (IRA), исто така усвоен во 2022-ра година, нуди субвенции со намера да се воспостави стабилен синџир на снабдување за електрични возила и проекти за одржлива енергија.
