14 јули, 2024
ПочетнаЕКОНОМИЈАКонечно добиваме евтина тарифа на струјата, еве како реагираат граѓаните

Конечно добиваме евтина тарифа на струјата, еве како реагираат граѓаните

Враќањето на дневната евтина тарифа на струјата, која беше укината пред две години, е одлична вест за многу македонски граѓани, особено за оние со помали приходи и пензионерите.

Од 1 декември годинава, домаќинствата ќе можат да користат поевтина струја во периодот од 13 до 15 часот, што ќе им овозможи да заштедат на сметките за електрична енергија.

„Ова е одлична вест за нас, бидејќи ние сме дома цел по цели денови и треба да готвиме, да переме, да грееме вода. Сега ќе можеме да го правиме тоа во конкретен период кога е поевтина струјата и да ги намалиме трошоците“, вели Марија, пензионерка од Скопје.

Денар разговараше и со експерти од областа на енергетиката и економијата, а тие велат дека ваквата мерка беше повеќе од потребна.

„Јас сум задоволен со оваа одлука, бидејќи ја сметам за една од мерките за подобрување на енергетската ефикасност и заштита на животната средина. Со оваа тарифа ќе се поттикне потрошувачката на струја во период кога има повисок производствен капацитет, а со тоа ќе се намали потребата за увоз на струја од земји коишто користат загадувачки извори на енергија. Исто така, ќе се стимулираат граѓаните да инвестираат во енергетски ефикасни уреди и да ги искористат можностите за субвенции и кредити за обновлива енергија“, коментираат експертите.

Меѓутоа, не сите граѓани се задоволни со овие промени.

Некои сметаат дека враќањето на дневната евтина тарифа е само козметичка мерка, која нема да компензира за зголемувањето на цената на струјата во последните години, како и за враќањето на стапката на ДДВ за струјата од 10 на 18 отсто.

„Ова е само манипулација со јавноста. Со една рака ни даваат малку евтина струја, а со друга рака ни ги зграпчуваат парите што ни останале како заштеда во месецот. Цената на струјата е превисока за нашите приходи и нема да можеме да си ја прилагодиме потрошувачката на тој краток период од два часа. Потребно е да има постојана и праведна цена на струјата за сите граѓани“, вели Горан, работник од Тетово.

Македонија, која беше единствената земја во регионот што применуваше поевтина дневна тарифа за струја, првпат ја укина таа тарифа во 2012 година поради трошоците за увоз.

Потоа дневната тарифа беше вратена во 2017 година, а се укина пред две години.

Б.З.М.

НАЈНОВИ ВЕСТИ

ХОРОСКОП