Баножиќ со џип уби татко на две деца, повеќе не е министер

Министерот за одбрана на Хрватска, Марио Баножиќ утринава предизвикал сообраќајна несреќа во која загина едно лице, потврдија од ДОРХ. Премиерот Пленковиќ го разреши Баножиќ, а функцијата министер за одбрана ќе ја преземе поранешниот државен секретар во Министерството за одбрана, Здравко Јакоп, бригаден генерал од Вишњица кај Лепоглава.

Како што се дознава, Баножиќ бил на лов кога се случила несреќата. Во несреќата загина 40-годишниот Горан Шариќ од Привлака, татко на две деца. Баножиќ претекнувал камион со својот теренец во густа магла и директно се судрил со комбе кое доаѓало од другата насока, потврди ДОРХ.

Несреќата се случила во 6 часот и 15 минути, на излезот од Винковац во правец кон Жупања. Баножиќ бил примен во болницата во Винковац во 8:30 часот, а потоа бил префрлен во КБЦ Осиек. Од болницата во Осиек било пријавено дека Баножиќ е на одделението за интензивна нега, дека има повреди на мозокот, градниот кош и екстремитетите и дека неговиот живот не е во опасност. Не се сеќава на несреќата, вели докторот.