Израелскиот премиер Бенјамин Нетанјаху денеска изјави дека израелските сили (IDF) навлегле подлабоко во Појасот Газа отколку што Хамас некогаш можел да замисли, предупредувајќи го либанскиот Хезболах дека ќе биде „животна грешка“ за нив да отворат нов воен фронт.
„На југ, војната се интензивира со сила која Хамас никогаш не ја видел. Градот Газа е под опсада. Ние вршиме притисок врз Хамас секој час, секој ден“, рече Нетанјаху, објави „Тајмс оф Израел“.
Тој рече дека „илјадници терористи се елиминирани“, било над земја или во тунелите.
Тој изјави дека во операциите биле уништени „безброј командни центри, позиции и тунели на Хамас“.
„Хамас штотуку сфати дека доаѓаме до места каде што мислеа дека никогаш нема да стигнеме“, рече Нетанјаху.
Кога станува збор за северот на Израел, IDF се брани и напаѓа, додаде Нетанјаху.
Тој рече дека Израел нема да прифати Хезболах или Хамас во Либан „да предизвикуваат штета на израелските заедници и граѓани“.
„Ќе одговориме силно на секој напад против нас. Доколку Хезболах влезе во војна, тоа ќе биде најголемата грешка во нивниот живот“, се закани израелскиот премиер.
