„ING Groep“, најголемата холандска банка, во петокот ја објави својата втора програма за откуп на акции годинава, овој пат до 2,5 милијарди евра, откако нето добивката во третиот квартал е повеќе од двојно зголемена од минатата година.
Банката, која опслужува повеќе од 38 милиони клиенти, нагласи дека ќе остане внимателна додека глобалниот економски раст забавува.
Банките беа едни од главните корисници на зголемувањето на каматните стапки во изминатите две години, но централните банки очигледно се ближат до крајот на овој циклус на монетарно стегање.
„Свесни сме за јавните дискусии за стапките на депозитите и во зависност од развојот на конкурентното опкружување, маргините на обврските може малку да се намалат од сегашните нивоа“, рече во изјавата главниот извршен директор Стивен ван Ријсвијк.
Нето приходите од камати достигнаа 4,03 милијарди евра во кварталот, што е под 4,12 милијарди евра што се очекуваше во консензусната проценка составена од компанијата.
Нето-зголемувањето на резервите за загуба на заемите достигна 183 милиони евра, под консензусната проценка од 322 милиони евра, делумно поради она што главниот директор за ризик Лилијана Кортан го опиша како „успешно ублажување на ризикот од Русија“.
„Изложеноста кон Русија е офшор, околу 1,5 милијарди. Ова всушност покажува пад од две третини во однос на годината што следи“, рече таа во разговор со новинарите.
„ING“ оваа година започна програма за откуп на акции до 1,5 милијарди евра, а други европски банки како „HSBC“, „UniCredit“, „BBVA“ и „Deutsche Bank“ неодамна објавија програми за откуп или планираат наскоро да ги лансираат.
Нето добивката на банката се зголеми за 103% на 1,98 милијарди евра меѓу јули и септември, надминувајќи ја консензуалната проценка од 1,83 милијарди евра.
