Кинеската компанија „Huawei Technologies“ забележа благ пораст на приходите во првите три квартали од 2023-та година, наведувајќи го растот во бизнисот со облак услуги, како и растечката конкурентност на единицата за автокомпоненти.
„Huawei“ објави приход од 456,6 милијарди јуани (62,4 милијарди долари) за првите три квартали од годината, што е за 2,4 отсто повеќе од претходната година.
За разлика од скромното зголемување на приходите, профитот скокна за 117,8 отсто за периодот на 73,05 милијарди јуани, според пресметките на новинската агенција.
Растот на профитот произлегува од плаќањата поврзани со продажбата на одделот „Honor“ во ноември 2020-та година, како и од подобрувањата во стратегијата за управување и продажба, рече портпаролот на компанијата.
Во третиот квартал приходите се зголемија за 1,5 отсто на 145,7 милијарди јуани, покажаа пресметките на „Reuters“.
Растот беше „во согласност со прогнозата“, коментираше ротирачкиот претседател на „Huawei“, Кун Ху.
Продажбата на паметни телефони на „Huawei“ се зголеми во третиот квартал, поттикната од лансирањето на серијата „Mate 60“ кон крајот на август, објавија три фирми за истражување на пазарот. „Counterpoint Research“ процени дека компанијата забележала зголемување од 37% во продажбата на телефони од година во година.
Тоа означува враќање за „Huawei“, иако од пониска база, бидејќи нејзиниот бизнис со паметни телефони е тешко погоден од американските контроли за извоз наметнати на компанијата од 2019-та година.
Од „Counterpoint Research“ велат дека „Huawei“ сега е шестиот најголем бренд за паметни телефони во Кина во кварталот со удел од 12,9%, што е зголемување од 9,1% во истиот период претходната година.
„Honor“ останува најголемиот производител на паметни телефони со 11,8 милиони продадени единици и 18% удел на пазарот, додаде „Counterpoint“.
