Шефот на европската дипломатија Џозеф Борел вечерва во Луксембург изјави дека министрите за надворешни работи на членките на ЕУ најостро го осудија терористичкиот напад на Хамас врз Израел и дека земјата има право да се брани, но во согласност со меѓународните хуманитарни закон.
„Во конкретниот случај тоа значи дека не смее да има исклучување на водата и струјата на цивилното население. Според хуманитарното право, опколеното население не може да биде лишено од вода и струја“, изјави Борел пред новинарите за ситуацијата во Појасот Газа, по состанокот на Советот за надворешни работи на ЕУ.
Борел рече дека министрите за надворешни работи „уште еднаш јасно го осудија терористичкиот напад на Хамас“ и повикаа на итно ослободување на заложниците кои ги држеше таа екстремистичка палестинска организација, која владее со Појасот Газа.
„Уште еднаш рековме дека Израел има право да се брани и дека ова право мора да се оствари во согласност со меѓународното право, особено со меѓународното хуманитарно право. Тоа не може да биде реторичка реченица, не може да се повтори како што со години повторуваме дека поддржуваме решение по моделот на две држави (Израел и Палестина)“, рече тој.
Тој додаде дека ЕУ поддржува решение засновано на моделот на две држави и оти верува дека правото на одбрана, како и секое друго право, има граници поставени со меѓународното хуманитарно право.
Борел, исто така, рече дека присилното раселување на стотици илјади луѓе не може да се изврши на краток рок од моментот на предупредувањето, кое се однесува на неодамнешниот израелски ултиматум до Палестинците да се евакуираат од северниот кон јужниот дел на Газа во рок од 24 часа.
„Се разбира, подобро е да се знае дека некоја област ќе биде бомбардирана, за луѓето да бегаат од таму и да ги избегнат бомбите, но мора да бидеме реални. Да се преселат милион луѓе на место каде што нема сообраќаен систем, каде што патиштата се уништени и каде што нема засолниште, потребно е многу повеќе време од 24-те часа дадени во последниот ултиматум“, рече Борел.
Тој изјави дека овој ултиматум не бил спроведен, можеби благодарение на предупредувањата на ЕУ.
„Луѓето се уште се движат. И досега немало копнен напад. „Бомбардирањето продолжува, хуманитарната ситуација е многу тешка и единственото нешто што можеме да направиме е да побараме хуманитарна пауза и да го зголемиме пристапот до хуманитарна помош“, додаде Борел.
