Google претстави нови опции кои ќе ја подобрат употребата на Chrome

Google продолжи да го подобрува најпопуларниот интернет прелистувач во светот. Оваа недела компанијата објави неколку нови опции за Google Chrome, кои иако не се револуционерни, секако ќе го подобрат и поедностават пребарувањето преку овој веб прелистувач. Новитетите се однесуваат на лентата за адреси во која се внесуваат барањата за пребарување и вклучуваат попаметни предлози за пребарување, автоматска корекција на типфелерите, пребарување во постоечките обележувачи во Chrome, предлози за популарни сајтови и подобрен изглед на интерфејсот.

Опцијата за паметни предлози за пребарување се базира на историјата на пребарување на некои страници. Додека порано, кога сакавме да одиме на страница, моравме да ги внесеме првите букви од таа страница во лентата за адреси, сега тоа веќе не е потребно бидејќи Chrome може да препознае која страница сакате да ја посетите врз основа на некои зборови и веднаш да ти даде предлог за таа страница. На нивниот блог, Google даде пример за пребарување на нивната страница за летови (google.com/travel/flights). Наместо корисниците прво да го пишуваат зборот Google, а потоа летови во лентата за адреси, сега Chrome, врз основа на вашата историја на сурфање, кога ќе почнете да го пишувате зборот „flights“, веднаш ќе ви ја предложи страницата за летови на Google.

Друга новина е поврзана со типфелерите, а поврзана е и со страниците што сте ги посетиле претходно. Ако погрешно го напишете името на страницата што сакате да ја посетите во лентата за адреси, Chrome ќе ја предложи вистинската страница за посета, игнорирајќи ја печатната грешка. Исто така, кога внесувате термини во Chrome, прелистувачот ќе предложи имиња на некои популарни сајтови, дури и ако направите типфелер, т.е. погрешно напишете буква, и ќе можете директно да ги посетите тие страници, без потреба прво да се прикажат резултатите од пребарувањето и потоа да кликнете на таа страница од тие резултати.

Друга новина која би можела да биде интересна за корисниците е пребарувањето ознаки директно од лентата за адреси на Chrome, а од Google велат дека го промениле или подобриле визуелниот изглед на лентата за адреси, која сега е исто така пореспонзивна, односно се прикажуваат резултатите побрзо.