Со пристигнувањето на студените денови, граѓаните се ориентираат кон купување дрва за огрев.
На стовариштата во Скопје се нудат различни видови на дрва, но најпопуларни се оние кои се продаваат веќе исечени и исцепени.
Ова им овозможува на купувачите да ги користат дрвата без потреба од дополнителна обработка.
„Ние продаваме дрва од даб по цена од 6.000 денари за кубик. Дрвата се исечени на должина од 30 сантиметри и исцепени на парчиња. Ова е многу погодно за пензионерите кои немаат можност да ги исцепат дрвата сами”, вели сопственик на стовариште во Ѓорче Петров.
Тој додава дека за ваквата варијанта најчесто се одлучуваат пензионери и пензионерки кои живеат во старите згради без централно греење или во куќи со печки на дрва.
„Ние им нудиме бесплатна достава до нивната адреса и им помагаме да ги распоредат дрвата во подрум или во гаража. Нашите клиенти се задоволни од квалитетот и количината на дрвата”, вели нашиот соговорник.
Една од нив е и Маргарита Пецаковска, пензионерка од населбата Даме Груев, која минатата недела купила 3 кубици дрва и платила вкупно 300 евра.
„Живеам во куќа и имам клима уред за греење, но тоа не е доволно за да ме затопли. Затоа користам печка на дрва за да создадам удобна атмосфера. Дрвата што ги купив од стовариштето се одлични, исечени и исцепени според моите потреби. Немав никаков проблем со нив”, вели Пецаковска.
Слично мислење има и Борислав Петровски, пензионер од Влае, кој пред неколку дена купил 2 кубика дрва за огрев.
„Живеам во куќа со двор и имам место за складирање на дрва. Но, не сакам да трошам време и пари на сечење и цепење на дрвата. Затоа побарав и најдов стовариште каде што се продаваат вакви дрва кои можам да ги користам веднаш. Платив 200 евра за 2 кубика дрва кои ги добив исечени и исцепени. Мислам дека ова е поисплатливо отколку да ангажирам луѓе да ги сечат на циркулар, а потоа и да платам луѓе за да ги исцепат. Вака добивам сѐ наеднаш”, вели Петровски.
Цената на огревното дрво – неисечено и неисцепено – во моментов се движи од 4.500 денари па сè до 5.500 денари во зависност од сортата на дрвото.
Б.З.М.
