Во 2024 година во Европа ќе има повеќе луѓе на возраст над 65 години отколку на возраст под 15 години, предупреди Светската здравствена организација (СЗО), која повикува на подобрени мерки за здрава старост.
„Следната година, популацијата на луѓе над 65 години се проценува дека ќе ги надмине оние под 15 години во европскиот регион на СЗО“, соопшти организацијата во средата.
„Овој тренд укажува на нови социјални, економски и епидемиолошки предизвици“, додаде организацијата, чиј европски регион собира 53 земји, од кои некои се наоѓаат во Централна Азија.
Низ Стариот континент, продолжениот животен век често оди рака под рака со нарушено здравје.
За да се ублажи влијанието на стареењето на населението, СЗО ги повикува властите да преземат мерки за „да им овозможат на постарите луѓе да го задржат и подобрат своето физичко и ментално здравје, независност, социјална благосостојба и квалитет на живот“.
Меѓу препорачаните мерки се издвојуваат урамнотежена исхрана и физичка активност од најмалку 150 минути неделно.
